Previous Story
Ta fan arikohe dinuebo!
|
Posted on Jan 09 2001
I Asunto: Diskuido yan dispetdisiu gi konsiderasion man-sustansiao siha na asunton publiko.
Opiñion: Maila` ta fan arikohe dinuebo ya ta aregla haanen i taotaota siha guine sin ditension.
Taya` esta kampo para kustumbren mañana gi guaguan na tiempo ni hagas ta dispetdisia kalan mohon nuebo na hugete. I kanai rilos ti siña ni unabes ta bira tatte pot para ta ta`lon tumutuhon mano `nai man-diskuidao hit. Pareho finalagon kanai rilos yan sinague` tase: Ni uno ha nanañga!
Hafa punton este na abiso?
Ni uno listo prumepara manera siha `nai siña ta ayuda taotaota deste kuatro años malofan `nai pago ha fatoigue hit didog na chinatsagan ekonomia. Lamayot patte finañagon i Asian Crisis. Lao, hita lokue` umatisa este na chinatsaga `nai, sin propio yan antao na konsiderasion, ta tutuhon inapprueban man-dañosu siha na lai kontra i komunidat bisnis.
Sumen presiso na ta fan arikohe tatte gi hilo` to`a yan antao na sensian kabayero pot para ta aregla amano `nai man-fatsu hit. Mas pago guaha esperansa gi ta petsisige na adelanton ekonomia `nai ma-apprueba ayo na akto i para u soyu` i presente na bisnis na u adelanta siha mas. Gi mismo tiempo, dañkulo na pudet mana` guaha para i dumiseseha man-halom mage man-bisnis guine gi tano`ta.
Presiso na ta komprende na kada chatchecho`ta, tres años tatte `nai ta pega adelanto siha `nai siña u guaha mas rinikohen kontribusion bisnis yan lokue` inestablesen mas chochu`. Ta fan satton gi este na patte ya ta funas ginen leblon Marianas todo man-dañosu na lai ni fumufuñot kinalamten bandan ekonomia.
Ekonomia kumeke ilegña, salape`! Megai kuentata pago na tiempo `nai mas poduñg i kantida ni hagas ta rikokohe para i pottanmonedan iya Marianas. Este siha na kontribusion i ta u`usa para apas setbision publiko tat komo edukasion, hinemlo`, yan otro siha na nesessidat. Pago i tiempo `nai debi ta aregla todo fatsu na checho`ta pot para ta abiba tatte i presente yan nuebo na bisnis siha.
Gi mismo tiempo, mauleg ta fan eyag man-eyag taimano umeyag mauleg yan maug` na mañan disposision areglon linahyan. Sumen presiso este gi todo konsiderasion yan disposision plano pot para ta adelanta haanen i taotaota siha. Si Yuus Maase` yan ghilisow!
