Tinilaika siha gi tiempo

Gi hinalom i nuebo na siglu, ha kikilili` halom man-adbansao siha na tinilaika. I kuestion: Hafa taimano `nai siña ta adelanta i kualidat lina`la` i taotaota? Un` seriosu na kuestion na debi todo patte gi komunidat Marianas u daña pot para umadiskute este na attikulo. Presiso na u guaha un` mapa `nai todos mañaonao gi un` finiho`.

Buente mauleg ta tutuhon diniskuten este na asunto gi pisun maseha mano na komunida gi tano` demokrasia: I Familia.

Antes, todo kinalamtenta gaige un` fitme na pogse` ni gumogodde pisu yan haligen familia. Fitme na pogse` sa` apmam na tiempo de ha sustene un` metgot na pisun yan haligen familia. Guiya este i dinaña` todo familia, sige huyoñg gi señgsoñg siha yan komunidat entero iya Marianas.

I man-bibisnis (maseha dikiki` na bisnis), inibliga kada membron familia na u fan ayuda. Yangin estudiante hao, siempre un` saonao man-ayuda gi finagpo` eskuela. I checho` ha inkluso muna` gasgas estante yan lateria, man-bali yan man-lampasu `an mahuchom tenda gi oran `las nuebe. Este na pattisipasion membron familia, diario.

I familia ni man-guagualo`, siempre u fan hanao i famaguon gi finagpo` eskuela para u fan man-ayuda hafa i tinago` tata yan nana. Ha inkluso man-dismonta, man-guasan gi entalo` tinanom, mananom, man-rega, muna` chochun pinegsai, muñgayo antes de minachom atdao. Dispues, man-arikohe ya ha bira siha tatte gi gima` ya mandaña gi fina` sena.

Hafa i punto guine?

I pattisipasion checho` familia, kao bisnis osino gualo`, ha sede i famaguon yan mañainan niha man-daña gi megaiña na kinalamten niha. I mas impottante i guaha kualidat na tiempo gi entalo` saina yan patgon man-madiñgan mientras sige mona i checho`. Kada uno ma-introduse ya malulog na debi un` fachuchue` yan masahalume todo nesessidatmo.

Este na chalan i hagas ta falofane antes maliñgo gi batidan modetno na modun linala` guine gi tano`ta. I hagas fitme siha na tradision man-kreansan patgon tinilaika nu i television, video yan otro siha na tane` ni ti man-homlu` na modu para i famaguonta. Man-matto hit guihe na eskalera `nai kontodo obligasionta komo saina tanae` guato i maestra yan maestro gi eskuela.

Man-tinane` hit nu i dibusionta diariamente `nai adumididi` ta sotta obligasionta guato gi otro tat komo maestro yan maestra. Gi mismo tiempo, man-malefa hit na kada patgon gi familia mauleg na finañago. Guiya lokue` ha espipiha haf` taimano `nai para u kesoda` futtunaña. Libiano man-osge lao ha nesessita na umapipet gi tutuhon.

Lao lotgun hao gi obligasionmo. Un` dis-attende nesessidat niha. Humanao dispues i patgon man-espiha otro ni munae`gue` attension. Estegue` na patte gi haaniña `nai mababa un` chalan `nai ni guiya mismo ti kapas dumetetmina kao kombene i ha petsisige. Gigon guaha munae` attension, gaddon. Lao, kao propio yan kombene na dinaña yan mismo man-hoben ni man-mañega lokue` attension saina?

Ti siña hu apunta hafa mauleg para in` chegue gi un` pisu ni hagas fitme na halige gi man-kreansan patgon. Megai na bisnis man-maliñgo deste bente años na tiempo. I gualo` familia hagas manma-atkila. Bula mampos tane` yan dibusion `nai chinema` i dos saina na una` guaha satton na attension gi nesessidat famaguon niha.

Yangin ti ta aregla este na patte gi modetno na linala` natibo, mas siempre u potlilo i fitme na pogse` dinaña familia. Gaige este na asunto gi dos patman kanai miyo komo mañaina. Si Yuus Maase` yan ghilisow!

Strictly a personal view. John S. DelRosario Jr. is publisher of Saipan Tribune.