Previous Story
Ti mauleg na señat siha
|
Posted on Feb 06 2001
I Asunto: Mas bahu i kinalamten i ekonomian iya Marianas.
I Opiñion: Mas siempre chatsaga i tano` pago na sakan.
`Nai i industrian konstraksion (construction) silensio mampos sa` taya` cho`chu` `nai siña masustene estao ekonomia, un` señat na mampos bahu i kinalamtenta guine gi tano`ta.
Patte este ginen baban ekonomian iya Japon yan Asia. Lokue`, patte ginen i lai siha ni man-mapasa gi mapos na lehislatura ni fumuñot mas i esta ha` bahu na ekonomia guine.
I uttimo attikulo ni madiskukute gi mapos na semana pot para uma-utot kandet depattamento yan ahensia siha pot man-delinkuente gi apas utilidat. Estegue` otro señat na mampos chatsaga i tano` na tiempo.
Mientras tantos, ayo siha na bisnis i man-homlu` kinalamten niha, sige madibina kao para u fañaga tatte osino u bende guinahan niha pago ya u fan hanao ginen iya Marianas.
Huñgan guaha siha man-nuebo na bisnis man-halom, lao tinaka` tiempo (pot lumenos tres años) estake u fan siña man-na`halom kontribusion tax. Gi mismo tiempo, i nesessidat pot mas fondu sige ha` de ma-umenta gi todo patte gi bandan setbision publiko.
I industrian turista kada kahulo`, tumunog. Ti fitme trabiha gi dos adeñgña sa` pago kumeke homlu`. I solu industria ni sumustetene kinalamtenta deste kuatro años malofan i industrian magago. Ta diseseha na u fitme kareraña maseha este ha` na industria estake siña i otro siha patte gi ekonomia man-na`lo tatte.
Sumen na chatsaga i masusesede pago gi halom komunidat bisnis. Maseha kuanto na animo, suette yangin man-mama` tinas ganansia maseha para apas empleao. Lamegai para umana` fan basta gi che`cho` niha pago na sakan. Man-na`mase` i los prohimos `nai matto uttimo notisia na taya` esta che`cho` niha.
Pot uttimo, ayo siha na fasilidat i hagas pumega tablon atkilon, esta pago ennao siha na offisina ti manma-atkikila.
Afañielos, pot para u didog mas i chinatsaga guine gi tano`ta na biahe na in` seseyo` hamyo para in` adahe todos ginanan miyo. Muñga i dispiddisiu sa` hago ha` para un` padese ennao siha na diskuido. Planuye mauleg todo gaston familia, ya in` po`luye dididi` para maseha hafa na mattiro. Si Yuus Maase` yan ghilisow!
