Previous Story
Priniponen tetminon atkilon tano`
|
Posted on Feb 13 2001
I Asunto: Priniponen tetminon atkilon tano` deste 55 esta 99 años.
Opiñion: Guaha merituña ayo na proposito ya mauleg ta diskute.
I presente na tetminon atkilon tano`, guaha `nai ha choma` hinalom maug` na industria mage Marianas, layeye pot kadada` i tiempo gi kontratan atkilon–55 años.
Masusede este gi tutuhon. Huñgan, bula manma-atkila tano` publiko yanpraibet gi uttimon i ochenta na sakan siha. Lao, ti todo manmahatsa i planon nuebo na bisnis osino industria pot tinahoñg tiempo gi hilo` atkilon para u rikohe tatte gaston niha.
Umafagcha` este na chinatsaga yan `nai umatlibes i ekonomian Japon yan Asia. Mas mapot makonsige planon nuebo na hotel yan otro siha industria guine ni ginagagao dañkulo na salape` atkilon yan gaston fasilidat. Estegue` layeye na ni hafafa ha` mahahatsa na tiempo.
I 55 años na atkilon, siempre ha afuetsas i mangai kabu` na fina` temporario ha` na fasilidat umahatasa. Ayo i pumetsige dañkulo na fasilidat gi hilo` i presente na areglo, man-matatñga maseha manfofontun pago nu i baban ekonomian turista.
I otro asunto ni mauleg ta konsidera gi mapropopone i konsetbasion dueñon tano` ni sumaga gi kanai natibo pot 99 años na tiempo. Umafagcha` este na intension yan i presente na Attikulo 12 gi papa` i Constitusion iya Marianas. I disposision fiñkas ni para u rikohe i familia ni muna` ma-atkila tano` niha, gaige ennao na direcho gi membron familia.
Esta lokue` ti senmegai tano` publiko osino praibet tetehnan ni siña manma-atkila. Lao, mauleg na intension i mapropopone p0t atkilon 99 años sa` mas ha presetba tano` natibo na usaga gi kanai man-natibo siha.
Diskukute este yan familian miyo gi fina` sena osino mirienda pot para in` fan atuñgo` gi hilo` antao na rason siha hafa hinasson kada uno. Si Yuus Maase`!
