Previous Story
Ebalua Palabramo
|
Posted on Apr 05 2001
I Asunto: Tai sustansia na palabra kontra as Speaker Benigno R. Fitial ginen kabesanten pattidan Republican.
I Opiñion: Eskohe i tai sustansia na akuso pot para tana` klaro hafa i asunto, dibuenamente.
Guine gi ma`pos na semana, makritisisa si Speaker Benigno R. Fitial nu i kabesanten i pattidan republican pot malalago i prohimo komo uno gi kandidaton gobietno.
I maipe na palabra ni tai sustansia gi magahet taya` presiso na u falagnos ginen sekos i kabesanten pattidan republican. Este na eskaleran politika i mas na`tata ni masusede guine gi ma`pos na semana.
Gi hilo` antao na hinisga sin politika, man-suette megai na taotaota cho`chu` sa` sumasaonao si Speaker Fitial gi mafotman megai yan man-dañkuo siha na kompania `nai manma-emplelea pago megai na taotao.
Yangin siña i kabesante i pattidan republican as Joseph C. Reyes ha prebeniye pareho na numeron cho`chu` para i natibo, mauleg talie` hafa gaige gi papa` mañgas chininaña.
Yangin pot politika na malaet` fino`ña, pues hago mismo un` tuñgo` ha` na tai bali yan tai sustansia i palabramo. Piot sa` ni uno mumerese i na`tata na mensahe `nai un` fanue` i publiko na chat-konsiderasion i asunton linahyan ni un` aplachae` sin kabales na hinisga.
Este i politikan muron debi todo offisiat pattida de u ma-atan sa` taya` presiso na tana` fan inkabukao i botadot pot mansusulon hit gi hilo` plaset estrakadan i mamamaila` na eleksion gobietno.
I publiko ti ignorante gi hafa i man-sañgan siha na asunto, piot sa` megai man-mamadedese pago pot didog na chinatsagan ekonomian tano`ta.
Estegue` i asunto ni debi si Señor Joseph Reyes u plaitea kao hafa i kandidatuña planuña fuera de mampos suspichosu na atetu gi para uma-aregla tatte i mampos bahu na ekonomian iya Marianas.
Pot uttimo, yangin ilelegña un` prohimo na kabayero-gue`, pues fanue` i publiko sustansiao yan añgoghuyon na plano pot para un` adelanta haanen niha. Na` para i politikan muron sa` ni uno mumerese burukan chat-kabayero. Si Yuus Maase`!
