Language and identity

The following are the rest of the winning pieces in the essay contest held by the Department of Community and Cultural Affairs’ Chamorro/Carolinian Policy Commission to promote indigenous languages in the Commonwealth. The contest was held on Feb. 24.

Sa’ hafa na prisisu na ta praktika I fino’ Chamorro?

Prisisu na para ta praktika I fino’ Chamorro para hita man Chamorro kosaki u guaha inadahi, inasosteni, inatbansan lengguahi, yan u la’la mo’na ginen pa’go para I otro siha ba hinirasion. Kumo unu yo’ na patgon Chamorro hu sienti yan hu analisa mo’na na sumen impottanti este I lengguahi-ta na ta u’usa diariu.

Hu komprende na gi gima’, meggai este siha na familia I man gai muchacha nai para u fan man ayuda gi bandan mamulan yan mama’tinas. Taya’ este problema-ña kumo hita nai mañaina ta kontinunuha ha’ prumaktika I lengguahi para I famagu’on nai manmapupulan gi gima’. Lao kumo taya’ ora yan tiempo para I famagu’on-ta, siempre I muchacha gumihilo’I I arekglon I familia gi bandan lengguahi. Kumo I muchacha appling fumino’ Englis, pues I patgon siempre appling lokkue’ kumuentos. Impottante na I mañaina u mana’ prisisu yan u ma mentena I lengguahin Chamorro kosaki munga’ na u hinilat nui appling na sinangan.

Gi hilo’ este na manera gi bandan Edukasion debi u guaha lai na para u prinitehi I bandan lengguahi nai initblibliga na uma kontinuha I finana’gue. Lokkue’ gi kada oran finana’guen lengguahi sumen bunitu kumo todo I estudiante uma praktika umusa I lengguahi. Este ha’ na manera nai sina u machule’ pat sino uma kontinuha prumaktika yan umatbansa gi halom kuminidat yan otro na dinana’ sosiat. Hu asigura na yanggen ta cho’gue este siha na hinaso yan diniseha para I lengguahi-ta, siempre man banidoso yan man banidosa hit nui man Chamorro.

Gi bandan Gima’ Yu’us si Monsingot Luis Antonelli giya Sinapalo, Luta hana’ guaguaha misan Fino’ Chamorro kada Damenggo gi oran alas singko gi ega’an. Estague’ na ihemplo ginen I kuminidat este pa’go lala’la ha’. Gi hilo’ este na manera, kumo estudiante yo’ gi Rota High School malago’ yo’ muli’e este na manera, kumo estudiante yo’ gi Rota High School malago’ yo’ muli’e’ tatbleron Fino’ Chamorro gi halom kuminidat Luta. Kumo guaha este siha na ihemplo, siempre I famagu’on yan I kuminidat man initbliga na u ma’usa I mismo lengguahen-ñiha, lengguahen Chamorro.

Pues maila’ ya ta abiba yan ta fan banidosu prumaktika I Fino’ Chamorro sa’ estague’ ginen I man guela’-ta yan man guelo’-ta. Ta sosteni yan ta mentena I uniku yan espesiat na lengguahi-ta.

Kayla Beann Mesngon
Rota High School
10th grade

* * *

Bula rason siha na prisisu ta praktika I lengguahen Chamorro

Fine’ne’na esti I lengguahen Chamorro unu gi mås guaguan na irensia ginen I mañaina-ta ya ti debi di u falingu sa’ impottånte gi kutturå-ta. Debi di u ma kontinua mapraktika esti I lengguahen Chamorro ni para u ma sostini I minetgot I kutturå-ta ni para ta fanå’gue I famagu’on-ta yan I famagu’on-niha.

Dangkolo na onru I lengguahi yanggen ta kontinua sa’ ta nånå’I gråsia yan respetu I mañaina-ta ni finana’guen-ñiha yan pot I guinaiya-ta kumu råså-ta. Parehu ha’ yanggen ta fana’gue famagu’on-ta ni lengguahi yan u mapraktika gi lina’la-ñiha kumu onru para hita. I lengguahita ni fino’ Chamorro munåna’I mensåhi I otro klåsen tåotåo siha ni pot håfa yan håyi hit na klåsen tåotåo yan manatachu hit pot guinaiya-ta nu I råså-ta.

Yanggen manmaleffa hit ni lengguahi-ta, pues siempre uttimo-ña tatutuhon fumunas I pumalu siha na kostombren Chamorro ni håfa man mafana’gue-ta kumu påtte gi kutturå-ta.

Hunggan na prisisu lokkue’ na ta tungo’ otro siha na lengguahi sa’ pot bula differentes na klåsen tåotåo gi tano’-ta, låo debi di ta asigura na mofo’na I lengguahi-ta ta tungo’.

Yanggen para ta asigura na ti u falingu I lengguahen Chamorro, debi di u fan ma soyo’ I mañaina na u mapraktika I lengguahi gi gima’ sa’ ti båli man mafanånå’gue I famagu’on-ta gi eskuela låo yanggen manhånåo para I gima’-ñiha, otro na lengguahi ma praktitika.

Pot uttimo, u fan ma soyo’ lokkue’ I mañaina na u mana’fan patisipåo I famagu’on-ñiha gi differentes siha na klåsen progråma ni mana’ guahahayi ni para u mås ininfuetsa I lengguahi yan I kutturå-ta.

Thealanie Mae C. Monkeya
Tinian Elementary School
4th Grade