Inaligao dicho adelanton natibu

Gi todo kinalamtenta guine gi O`Perlas iya Pasifiko, debi de ya hululo` i interes pot adelanton taotaota siha. Taya otro attikulo siña tumulaika este na asunto pot taotaota, para taotaota yan ginen taotaota.

Piot pago gi tiempon eskases, ni uno siña umatrebigue umaminasa pinetsigen adelanton taotaota siha. Isao i para un` hasñgune i asunto. Tai sensia antao na mañan responsablidat i umintendet pumatañg para adelanton linala` natibu.

Gi prumet lugat sumen bahu i makenarian ekonomia guine. Mas menos rinikohen fiñkas salape na biahe, lamegai na bisnis humuchom pettan niha. Este na chinatsaga matranslada guato gi mana` fan para taotaota gi chechu niha.

`Nai mantai chechu ya ni mona ni tatte, tumaya para apas primet na guma familia. Los uttimos, man-maamot ni gima niha ya sige pago man-ensinahyao gi gima mañainan niha sino parientes. Sumen na pinite este na chinatsaga ni inafuetsas nu i baban kliman ekonomiata.

Pot esso na hu chochoneg amano i siña umesgaihon nuebo na bisnis ni man-dañkulo pot para bai` kubre, maseha adumididi nesesidat taotaota man-mañoda` offision niha pot para u prebeniye familian niha. Hu tuñgo yan hu komprende kabales chinatsagan tai chechu sa` malofanyu guenao na chalan antes. Hu tuñgo linala` didog na pineble sa ginen ennaoyu mage.

Hu tuñgo hafa ñalañg sa apmam de hu padese mamañot aire yan hanom tupu ni mi-amot Clorox. Megai pumadese este antes lao ni uno sumeha mañufa` gi halom gualo sino lumiof gi halom tasen santatte yan sanmena. Sumen namagof i manfafachochu hit antes `nai ta kubre nesesidat familiata siha.

Mansuette i taotaota na tiempo sa` guaha ayudon foodstamps `nai siña maprebeniye nesesidat neñgkano familian niha. Taya antes este na klasen ayudo ya dimas de un` fama` professot karisu, maulegña un` tulos hao para i lancho sino tase ya un` fan ayuda prumebeniye nesesidat familia. Taya tiempo para lodu chefla pat yeñgyuñg mutuñg damagas.

Pues yangin magahet sentimentomu na un` pinitiye taotaomu siha, egaga` yan un` saonao mumatcha gi todos chechu animo umadelanta appottunidat chochu yan fiñkas pottanmonedan iya Marianas. Este na pinetsige siempre kontodo hago sumen magof gi minachom atdao.

Gi hilo sensian kabayeru, esperansa yan motmut na respeto para kada uno, ta faisen ayudon i Sainata gi todo pinetsigen para minauleg todos. Taya intereshu kreditu soluke benefisiu para hamyo. Si Yuus Maase`!