Ritiradan Bakasion

Man-hanau membron lehislatura man-bakasion giya Palau gi mapos na semana. Sige malista dispues eskusu hafa na presisu na u fan bakasion ginen kalaguag publiku. Dispues ‘nai marepara na lache oran bakasion niha ayu mina’ kulan sisitan i finalaguen eskusu siha.

Sa’ ya mohon mañaga tatte ya maguadog halom gueku na kakaguñg niha, siña masoda’ mas ke siñku na resulasion pot para uma-adelanta linala’ tautauta guine.

Esta sumen na’mamahlau sa’ antes ha’ de u fan ensinahyau huyuñg gi ruplanu, ma-adapta dos aktu: Unu pot pantie famalaoan ni man-matatala’ gi sanhiyoñg; i otru pot biskileta. Ileghu na kumu man-satton este siha na los probres gi offisiun niha ti u faneghon papa’ pot “pantie” famalaoan yan biskileta. Señores yan señoras, gaige i asuntu gi probleman ekonomia guine.

Gi talulu’ gi halom chubasku yan pagyun taya’ fondu man-hanau ha’ hamyu man-bakasion? Ti mattu gi hinasson miyu na i kontribusion tax publiku umapase bakasion miyu? Hafa mohon pinadesisiña i publiku na mampos in’ hasñgon malabidan miyu? Na ti magahet na todus man-chachafleg ya para in’ hasñgon man-bakasion ginen kalaguag niha?

Hafa mohon ya in’ fanue’ i publiku hafa planun miyu para in’ adelanta i sumen chafleg na ekonomian tano’ta? Siña in’ presenta hafa ennau na planu sa’ kulan no siakassu hamyu gi pinadesen i tautau siha gi señgsoñg? De dios mihu na diskuidu kontra i tautau ni in’ represesenta!

***

Un’ tiempu antes, sessu hu dalalag si Tata tumalaya giya Puntan Muchot. Hafana’gue-yu’ man-go’naf tiau, pegi yan faya gi halom unai. Dispues hu distilpas ya hu sahguan gi alan niyog ni finatinasña. Sige ham luchan esta kase i menan Hafa Adai Hotel pagu. Dispues in’ bira ham tatte para bai’n gacha’ makone’ mame.

Esta pagu ayu na lugat hulili’e gi hinasoghu ‘sino guinifihu. Tai malefaghu ‘an ha akanteha finalagon guihan gi halom tasi. Dispues kumahat antes de hu dagau i talayaña. Guaha ha’ ‘nai hulie’ otru siha talayeru bumisita i mismu kumuderu. Hu busisita tatte gi hinasoghu ayu na lugat ‘an ha gacha’yu’ mahalañg ñaihon as tata ya sige pagu hu ‘rastreha pasuña.

***

Ayu na strechun unai iya Puntan Muchot tat ti ha chahlau desde antigu na tiempu, kontodu geran dos ‘nai mit pot mit man-matai na sindalu ‘nai mahatme Saipan ni Amerikanu gi 1944. Matulalaika i hechuran unaiña depende gi hafa na patte gi sakan.

‘An Agustu ‘nai humalom i tiempon pagyu, mas inus i inaiña sa’ binatsala ni napu guatu estaya iya Mañagaha. Dispues de mapau i mattiempu, adumididi’ ha birague’ tatte i inai ya sumaga gi sagaña. Kulan i mañglo’ ni guaha ‘nai matulaika direksioña.

***

Sige ma-akanteha yan ma-estudiaye taimanu ‘nai siña ma-asegura presetbasion uson liñguahe Chamorro. Mauleg na intension yan animu i chumochoneg uson liñguahen tanu. Lau gaige primera appottunidat manala’la’ hila’ natibu gi apusienton familia.

Kumu diariu este na eksisiu, mas libianu i famaguonta man-eyag uson liñguahen niha. Debi na ginen halom este na ineyag. Mauleg tafana’gue famaguonta ni finu’ niha. Este solu uttimu sasyan ‘nai siña ta asegura na sumaga yan homlu’ i finu Chamorro gi halom man-natibu.

***

Suabe, bonitu na sunidu, na’mahalañg yan hana’ pasifiku siñienteghu ‘nai sige madandan gi CD player. Ilelegña i kanta, “Ta hita manguife gi halom mapagahes”. Entre guahu na maisa, hu oppe in sinañgan i kanta, “Sa’ ya siña hu hagu’ hulu guahu finenina guatu”.

I pañgpañg pianu yan gitala mampos suabe na esta ha yute’ papa’ i haguan tatkilu’ haga’hu. Mañge’ na siñiente i dumeskansan ñaihonyu man-hassu trompison asuntun linahyan. Lau guiya este i mafanana’an deskansu ni todu mumirese.

Maliñgo maigohu dispues hulie’ gi un’ ratu na guinefihu i amku’ hafaisenyu haf’ na mamposyu’ masogsug. Buente kulan ha besitayu’. Lau esta lokue’ gaigeyu’ i idat man-rusketi ‘nai mas paska te’lañghu, mueye’ timoghu yan maliñgu sensin koduhu. Komprendiyon sa’ todus siempre u fan malofan gi mismu chalan. Ni unu u soplu!

***

Sige si nana de ha hopyat i eskomen mai’es gi halom un’ palañggana estake nau’au asientoña. Ha rikohe ya ha guleg dispues ha pega gi mitate para una’ finu mas. Ha pada’ ya ha yotte gi hilu un’ maipen fina’ tepañg. Diberas na mañge’ titiyas piot i fresko na mai’es. Ha dobla si nana ya muna’lagu atmayas. De dios na pairen miriendan taloane. Mas paire ‘an ha tunu freskon guihan para gachoñg pagu mamasa na titiyas.