`Nos kuantos asunton linahyan

Mampos hana` tristeyo` `nai hu resibe finohu` na guaha siha taotaota para u diñgo i tano` pot para u fan e`chochu` giya America. Guaha esta pot tres años manman-nañga appotunidat pot para u prebeniye familian niha. Lao apenas chochu` guine ya pot este na motibo na para u fan hanao lago.

Yangin este na estao `nai para ta pega futtunan famaguonta, pot fabot tutuhon umaregla i pisun paraiso sa` hita mismo fuma` sasalaguan tano`ta para i manatatte. Mampos este na asunto ha estotbayo` sa` ti este guinififiho para futuron famaguonta.
****

Offisiat publiko obligasionña umadelanta linala` mayotmente gi man-ordinario na taotao siha. Lao yangin deste sais años malofan ti un` prepara yano na plaset linala` para i taotao ni un` represesenta, pues diniñgo hao nu i asunton linahyan siha.

Ginen este na diskuido na mas bahu linala` natibo guine siha na islas.

Siempre u fatto ayo na haane `nai i publiko u sensura sin ditension hafa gradumo komo offisiat publiko. Dañkulo dinidaho na guaha para u fan mañule` “A”; guseña higante na “F” ni machuchuda` fasuña ni yinimogña.
****

Humalom un` miyinario ginen Hong Kong guine gi alacha. Gi deklarasion salape` gi papet Customs ha pega papa` seru sa` magahet na timañuñule` moneda.

Maguot` tatte i prohimo. Dispues ha lagnos sais na “credit card” ni balin $6,000,000 kada uno. Manduda i empleao Customs. Guaha sumañgan na mampos “fresko” i prohimo.
Dispues masotta `nai matto un` offisiat ni kumomprende haye i maditene na bisita.

Humanao dispues para iya Tinian gumando huegon chansa. Gi halom menos ke trenta minutos, mapede ennao i $300,000. Ti inestotba sa` miyinario. U birague` mohon tatte este na prohimo manbisita talo? Dudayo` kao u talag halom gi un` isla (Saipan) `nai matrata kulan sake. Dios miho!
****

I LNO giya Honolulu guaha `nos kuantos Van para uson manmalañgo. Lao guaha besis lokue` `nai manasetbe este na transpottasion para offisiat ginen Marianas gi huntan niha siha.
Debi este na fatsu umakorihe ensegidas kosake ti tana` fan mannañga i malañguta siha gi hospitat osino membron familia ni munesessita deskanso. Hafa mohon kayu? Ti finatinasho ha` este na punto soluke mafatto ginen i manmaisague.
****

Este i asunton hinemlo`, mampos guaguan gi kontra i dikiki` na sinahguan pottanmonedan familia. Dos na fabot siña ta chogue pot hita mismo:

1. Adahe hinemlo` famaguon miyo ya asegura na bula eksisio diaramente yan mauleg na neñkano` makakano gi kada sentada.

2. Pot no un` ginacha` indigto, famahan health insurance fuera ke hafa in` i`isa pago kuentan katsu yangin finagchae` hao gotpe. I taotao ha prepaparague` `nai brabo yan homlu` ti `nai este sumen malañgo `nai para u hahasso hafa mauleg para u petsige.
****

Pot malofanyo` guine na chalan (`nai ma-opera tres biahe i lahiho) mina` hu tuñgo yan hu komprende hafa pinadesen didog na chinatsaga gi pottanmonedan familia. Hu diseseha gi Saina na ti u pega otro prohimuho gi taiguihe na finapos sa` sumen puti `nai esta ni mona hao ni tatte.

Este na finaposho muna` komprendeyo` na megai gi taotaota siempre ha fana` didog na pinadese mientras este na asunto ti ma-arelga ensegidas.

Pot fabot, muñga manañga na estake ha gacha` hit indukto `nai para ta fan e`ensinahyao pot para ta suheta mattiron chinatsaga yan gotpe.
****

Ilegña i amiguho na todo klasen amot guaha para maseha hafa na chetnot.

Un` semana dispues mana` hanao pot masuspecha na kanset i titanosña.

`Nai ha birague` tatte, hulie` gi halom hospitat na mamokat dispasiuña ke umañg. Hu guot kanaiña kadu` ti kumuentos ham pot abundansia amot para kontodo i chenotña. Ni ti ha tuñgo` haye-yo`. Dios miho!