Antigo na tradision umakamo`

Kase ennao i tutuhon i sitienta na sakan uttimo hu lie` mapraktika i antigo na tradision umakamo`. Dispues de ennao, esta ha tutuhon i natibo humanao guato gi hotel pot mas konbiñiente.

Taya` esta `nai talie` komplimento `nai dumaña` i familian i nobio yan nobia pot para u masera i uttimo finiho` antes de u akamo` i dos taotao.

Maliñgo i mahatsan fanliheñg fandañgo `nai mandaña` i manhoben manman utot piao osino lodu` na tañgaantañgan pot para haligen i brin. Magpo` lokue` i ñgayo `nai guaha manmatarea hayon tañgantañgan para i hetno yan lugat muna`lago.

Esta mas menos i pino` guaka sa` bula pago trosu siha na katne ni manresunable presion niha. Dos, tres kahita, nahoñg para pot roast osino b-steak. I babue ma-inkatga gi hetnon praibet. Kase dos entero babue nahoñg para i lamasa. Entre mahotnu osino mabira.

Bula lokue` esta bisnis pastre yan kusinan praibet `nai ma-inkakatga `nos kuantos putahe. Entre ma-inkatga yan nina`huyoñg familia dumaña para i lamasan fandañgo. Mas libiano i checho` `nai mapega guato gi hotel. Magahet na laguaguan lao taigue esta i manadan burukan i muna` fandadañgo i fandañgo.

Trabiha lala`la` i tradision aug`. Guiya este na patte `nai i nanan i nobio mamahan alahas siha ya ha presenta guato gi nobia.

I ta sasañgan pot komplimento tinahgue nu i “shower”. Todo klasen shower guaha fuera ha` de para i nobia, lao para maseha hafa na okasion. Dios miho!

Haanen Gupot Siha

I Haanen Gupot siha siempre u matutuhon deste otro semana gi Huebes, Nobiembre dia 23, Haanen Thanksgiving. Estegue` na haane `nai humalom i selebrasion Christmas.

Mauleg in` planea dinaña familia `nai siña in` rinueba i hagas mañge` na amesta yan inagoflie` gi entalo uno yan otro. Estegue` na tiempo `nai mas libiano ta limienda tatte i inachachag osino chinatkomprende gi halo familia. Mauleg na tradision preparasion deste antigo na komunidat Marianas `nai todo man-inalulula umaregla siha para i finatton kompleaños i Niño Jesus.

• • • •

Sesso antes hu huñgog i man-amko` masañgan pot gineftao selebrasion Noche Buena gi todo i señgsoñg. Bula pastre yan buñelos dagu gi kanastra gi menan guma` natibo. Haye malago` kalan sumepe-gue`, libre na u chogue ennao sa` tradision natibo.

Maliñgo este na tradision, lao buente kinatsu nu i gipot familia `nai man-na`chochu nu i taotao Niño. Magahet na achogha` este na dinaña, matto gi sumen na`magof sa` dumaña i familia i preparasion neñkano. Esta fresko na mañglo ginen sanhaya ya motmut respeto, saludo yan felisitasion gi entalo` mañelo, parentela yan bisita siha.

• • • •

`Nai sige masañgan na abundansia boñelos dagu antes, dinanche i man-sañgan sa` man-guagualo` megai na taotaota guihe siha na tiempo.

Lao buente pot tinilaika i modun linala` natibo, hasan esta dagu sa` memegaiña man-gagalileg gi menan television. Enlugat de dagu yan totchen fresko na katne yan guiha, gaige na setbesa yan manog potlilu ma plalanta gi lamasa.

Dudayo` kao bintaha este para i natibo sa` gi mismo tiempo mas ma-umenta i numeron daibetes yan chetnot korason deste bente años na tiempo. Taya` i modetno na linala` natibo siña tumulaika fuera ke hita mismo. Kaikai` hamyo osino mas lokue ridondo sinturan miyo. Piligro este na modu para hinemlo` natibo. Dios miho!

Strictly a personal view. John S. DelRosario Jr. is publisher of Saipan Tribune.