Abiba tradision Chamolinian

Deste tutuhon taotao guine siha na islas, si guelo yan guela dos lugat sesso mabisisita gi rinikohen mantension familia, era i tase yan tano. Diariamente man-machochu gi gualo. Guaha na haane `nai ha tulos siha para i tase para u fan peska `sino man-hanao man-kasadules gi halom tano. Este na modun linala` tradision natibu deste antigu na tiempu.

Gi este na kinalamten familia, famaguon natibu mañasaonao gi offision gualo yan peska. Estague` plaset makreansan patgon isla gi hafa debi u tuñgo pot para satbasioña `an esta dicho taotao. Gi todo pot todo, mañasaonao este siha na famaguon gi chechu familia. Kao peska, muna` gasgas gi gualo, kasadules, mananom pat man-limiendan talaya, todo ineyag niha ginen as guelo yan guela.

Fuera de ineyag pot linala, guaha siha finanaguen mañainata tat komo tradision respeto gi famaguon niha. Yangin un` patgon motmut respeto giya guiya mismo, pues siña ha respeta i prohimuña gi maseha mano na komundat natibu. Sumen na` banidosu este gi famaguon natibu piot gi halom linahyan. I mañan famaguon guiya espehos i dos saina gi hafa hafananague famaguon niha.

Yangin malulog mauleg i patgon pot respeto pues todo kinalamteña siempre ha respeta propiadat otro, difirensiao na opiñion taotao, yan otro siha asunton echu taotao. Gi todo pot todo, motmut respeto para guiya mismo ya ha embrasa prohimuñad siha.

***

Dispues de umeyag i patgon respeto, makreansa lokue nu i mañainaña sensian hinimidde. Dumaña i respeto yan hinimidde gi mañan ennao na patgon ya ha tutuhon kumomprende sentido na sentimenton prohimuña gi oriyaña. Ha tuñgo estao prohimuña ya ha lagnos kanaiña para u fan ayuda gi checho linahyan pat `an gai chinatsaga i otro taotao.

Gi halom dinaña, umekuñgo mauleg hafa siha man-madeskukute. Listo man-nae` antao na rason pot para u esgaihon mona i dinaña hunta. Gaige giya guiya sensian hinimidde para u adelanta hafa mauleg asunton inetnon. Taya `nai ha plachae` i madiskukute soluke para u atbansa hafa para minauleg todos.

Este i dos attikulo, sumen presisu para maseha haye na hobensito `sino hobensita. Lao gaige mofona giya hululo i ineyag linala espirituat `nai siña mas masimiento mañan respeto yan hinimidde. Yotte ennao na añkla gi fondun tasen linala`mu. Ni hafa na chubasko u fatto, huñgan siña kinilili hao gi un` banda lao ti u lailai boten haanimo katkuet direksion. Siempre un` gai tiempo mangagao para u klaro hinasomu.

Gi maseha hafa na estao `nai gaige hao pago, finañagon haf` bidamu antes ayo mina` gaige hao guine na tiempo. Yangin un` un` usune i guaguan na tiempo antes, pues seguruyu na libiano linala`mu pago. Yangin un` despetdisia, pues guaha siha chinatsagamo ya soluke un` espiha haf` debi de un` aregla gi haanimu, gatdon hao gi mano `nai uma`akalaye` hao na tiempo.

Pot uttimo, ha pega i Saina ilumu gi hilo apagamo ya hana talag mena. Guaha motibu na ha pega iluta ya hana` fana` mona. Gi silensio na patte pago na haane, hason ñaihon hafa sustansian i pago hu deskukute pot ilon taotao gi hilo apaga niha. Sen mas, bien felis para todos.