Lache na hineñge pot hinekog i tano`

Yangin magahet i ha predikta si Nostradamus pot hinekog i tano`, pues ti baiho gai chansa tumuge` este na attikulo pago na semana sa` para i humoñgge i fino`ña ayo na prohimo, debi u fagpo` haanen todos gi mapos na semana.

Hu lie` lokue` ayo na video yan kontodo lebloña ni hu taitai esta i uttimo pahina. Guaha siha manmagahet gi ha predikta manmasusede dibuenamente, lao ni ayo ti ha kone` hineñgegho ginen i prefekto Nanalibre. Dispues, yangin ti fitme hao gi hineñgemo Katolisismo, un` ratuto hao tinemba nu i ha predikta siha na asunto.

Giya Japon `nai mas megai fuma` relihion i fino` Nostradamus lao ti mañgilisyano este siha na taotague. Buente patte ma-embrasa hafa fino`ña si Nostradamus pot basnag ekonomian Japon deste dos años malofan ya guaha mas ke dos miyon mantai checho` na ora.

Kada uno konsu intetpretasionña nu manmapredikta, kontodo pagpag botkan si sanhilo` na patte giya Japon `nai megai para u fan pinino`. Lao guaha uno prumedikta na siempre u fatto mes Septiembre, Oktubre, Nobiembre yan Desiembre. Ilelegña este na taotao na kada grupon relihion ni mafañago ginen i fino` Nostradamus gai asunto ya ni uno pareho yan i otro.

Petsonatmente, ti siña na baiho trata si Nostradamus komo yuus maseha guaha siha gi fino`ña manmagahet. Guaha lokue` siha gi ha predikta ti manmasusede ni u mestablese klaro na guiya lokue` i prohimo lalache sa` taotao-gue lokue`. Para u fuma` relihion niha i fino` Nostradamus, man-namase` sa` hafa` yuus niha i palabran un` taotao ni lalache. Na` para sa lache in` petsisige.

Makat hu esplika hafa dipotsihe sustansian ayo na palabra i “fiet” (faith gi fino` English) pot rason na este na inañgogho sumasaonao un` sumen na`chatsaga na finapos osino ekspiriensia gi taotao. Ti todo para u fan malofan guine na kanton kantit osino momento `nai gaige un` adeñgmo gi halom kahon ataut`, i otro gi sanhiyoñg ya didog nachinatsaga un` fafana`.

Guaha finaposho ni bumirayo` tatte gi relihionho `nai hu pega haaniho gi kanai i Nanalibreta. Deste ayo na haane gi Oktubre 1989 hu pega haaniho enteramente gi disposision i Saina. Hu sotta todos manlache na guinifiho pot hafa dipotsihe linala` taotao. Hu aksepta todo disposisioña diaramente ya diberas pot primet biahe gi linala`ho kontenyo` ni todos manaiho ginen hilo`.

Gi hineñgegho, i uttimon i tano`, guiya ayo na haane `nai ma`agañg hao nu i Saina para i tai hinekog na deskanso. Kumeke ilegho, `an matai hao esta ti un` talo tatte gi entalo` familiamo, man-atuñgo` yan todos guine na tano`. Lao gi mismo tiempo un` tutuhon nuebo na linala` gi otro banda. Yangin listo hao, pues siempre preparao hao yangin u fatto este na boniton haane.

Nahlalañg na asunto

Kada dia este na amko` malag i plasan batkon aire. `Nai sesso malie` guihe, finaisen ni un` empleao hafa na diaramente mafatto gi plasa kada finatton ruplano.

Ilegña i amko`: “Ai lahiho, hu nanañga ininkatgagho palaoan”.

Finaisen amano `nai man-inkatgague` bentan palaoan.

Man-oppe i amko: “Gi katalagon Sears Roebuck, iho”. A` Saina!