Checho` innosenteria kontra Marianas

Guine gi alacha, guaha un` maestro ginen este malolofan gi un` chalan giya San Francisco `nai halie` grupon estudiante mañasaonao gi fina` matcha kontra industrian magago guine.

Tumunog ginen i karetaña ya hafaisen hafa na mañasaonao gi un` aktibidat kontra Marianas. Man-oppe un` estudiante na manmaapapase siha nu i US Textile Labor Unions para u fañaonao man-matcha gi menan un` tendan magago pot para uma`atisa kinentran industria guine.

Man-finaisen talo kao matuñgo` amano `nai gaige iya Marianas. Manman-oppe na ni siha mismo ti matuñgo` ni un` poñgpuñg pot tano`ta. Lao mañasaonao man-matcha kontra tano`ta sa` paire na koyenturan koble antes yan dispues de oran eskuela. Misalape` i labor unions giya California umapase este na kinentra kontra Marianas.

Ti komprendiyon i teug` na lebog guine na asunto ya sige hu dibina hafa na mampos si Congressman George Miller ha kokontra hit lao megaiña na abuso kontra empleao industrian magago giya California manmasusesede. Piot sa` ni mismo offisiales federat ginen i Depattamenton Labor, Immigration yan ginen California mumalague` uminbestiga este siha na abusa sa` mampos megai fakterian magago.

Este siha na fakteria ha u`usa i kelat para u poñgle halom i empleaoña siha ginen otro tano`. Guine, ta u`usa i kelat para proteksion empleao piot sa` memegaiña famalaoan. Lao todo i manmalagnos na gaseta mampos mana` atlibes i asunto gi hafa hiniñgog niha. Taya` pasu machule` para u makonfitma i mansañgan. Todo este siha na ripot manlache ya bibu man-machalapon kontra hita `nai kontodo man-ignorante na estudiante man-ma`apapase para u fañaonao kadu` mahoñge lokue` na huñgan didog probleman abuso guine giya Marianas.

I u-miluye este na muebemento si pindeho Allen Stayman, ginen kabesanten un` offisina gi Depattamenton Interior. Mampos este na señor hafa` kontrario Marianas gi todo kinalamteña. Matto gi tai respeto gi sustansian yan signifikasion i kontratan i Covenant (lai federat) ni u-mestablese i relasionta yan Estados Unidos de America.
Ha yute` hafa dicho responsablidatña gi papa` este na offisina para u labla dumestrosia i reputasion tano` yan taotao Marianas.

Buente komprendiyon i ha petsige na asunto layeye pot mampos brabo yan aktibo i US Textile Labor Unions mangasta gi eleksion kontrariuta tat komo si Congressman George Miller yan otro siha na membron Congresson America. Alakuenta, man-inestotba sa` mampos tatkilo` kualidatña i attikulon magago siha ni maproduduse guine giya Marianas. Mientras sige hit ta adelanta kinalamten este na industria guine, duro man-gupot ya ha pogsai i senturan niha sa` mapolu na ni ñgaian `nai siña guaha kompetensia kontra i industrian niha gi mismo produkto siha.

I mas dañkulo na estotbu gi este siha na estrakadan chechu` tinailaye i hafa` fagas pachot niniha i sensian diskriminasion kontra taotao Marianas ya ni unabes `nai matto gi ñaba` na kabesan niha na man-sudadanon Amerikano hit lokue`. Tatnai matto gi hinasson niha na pot man-sudadano hit lokue` na mangai direcho hit mana` fan halom gi Komunidan Ekonomian Estados Unidos de America. Lache i para u chanda este na direcho. Lache i para u-mana` oppan sensian diskriminasion kontra hita komo sudadanon Amerikano.

Hu gagagao i Saina na unae` kinemprende i ti gumoflamen hit sa` lache na sensia yan i hinasso i para u-mapetsige areglon diskriminasion gi un` asunto `nai esta manhihita komo familian Estados Unidos de Amerika. Si Yuus Maase`!