Espehos i mamamaila` para hita

Guine gi tres dias malofan, matatachoñg-yo` gi halom hospitat hu nanañga tareho para bai`n alie` yan mediko. Mientras tantos, hu lie` `nos kuantos man-amko` gi menaho mangai pinadese lokue`. Guaha manmachochoneg gi wheel chair sa` ti siña esta man-laho gi siha ha` namaisa. Gaige gi matan niha un` didog na chinatsaga ni gumuot` attensionho.

Era, matto gi hinasogho na un` dia siempre baiho gacha` ayo na eskalera `nai guaho mismo ti hu lañgagyo` mismo osino pot inamkoho, machochonegyo` lokue` gi wheel chair. Mampos hana` chatsaga siñientegho i hu lie` guihe na haane. Sige kumilulog hinasogho gi halom tano` kuestion ni ti siña hu satba. Uno konsueluho: hagas hu pega haaniho gi disposision i Nanalibre.

Mientras mafatto tarehaho, sige hu konsidera i minapot yan gaston familia pot minalañgo, piot ayo siha i manninaye chetnot tat komo daibetes, probleman korason, riñihon, osino kanset ni tinaka` apmam na tiempo estake manmadispone. Este na pinadese sumen mapot talie` mattiruña (gi bandan attension yan gaston familia) soluke un` pokate ayo na sabana ginen papa`, hulo`. Makat na kontrario gi kada membron familia deste tiempo yan gasto diaramente, haane yan pueñge.

Este na mattiro humahalom asunton insurance hinemlo` para i malañguta na tiempo. Esta taya` dibatde na setbisio ayo mina` hu yayama attension miyo pot este na nesessidat–insurance hinemlo`. Yangin ti elihible i malañgumo medicare osino medicaid, pues siempre i familia rumesponsable nu todo gaston hospitat yan amot. Pot este na rason na presiso na in` rikonose ya in` chilie` insurance hinemlo` i familian miyo. Chatmiyo chumatataogue este na asunto sa` diberas un` sumen dañkulo na gasto gi pottamonedan familia.

Dispues, ta fafahan insurance guma`, kareta, haanita, apas kandet yan television. Pega papa` lokue` apas insurance hinemlo` para familiamo sa` presisuña este ke apas television osino mama` yan otro dañosu na bisiu siha. Hinemlo`ta este na asunto ya ni uno tumuñgo` ñgaian na para tafan kama apmam na tiempo. Pues, tafan mama` i edot–prebeniye para i mamamaila` na fina` gotpe siha piot pot bandan hinemlo`.

I hinalom todo klasen taotao guine deste dies años malofan ha konene` halom lokue` difirientes klasen chetnot deste TB esta sago siha ni tatnai talie` antes. Mas dañkulo i chansa machalapon este siha na chetnot ke `nai trabiha ti ha hahatme hit kantida na taotao hiyoñg. Pot este na rason na mas presiso mamahan insurance hinemlo` pago na tiempo.

Pot fabot atetuye este na asunton familia sa` presiso para haanen todo membrom familian miyo.

Esta lokue` matulaika i hagas dibatde na setbision mareferen malañgo para hospitat hiyoñg Marianas. U fatto i tiempo `nai yangin tai insurance hinemlo` hao, siempre un` usa fiñkas familia para un` apase todo kobransa ginen hospitat Saipan mismo yan lokue` Guam osino Hawaii.

Gi kadada` na manera, esta taya` dibatde na setbisio pago na tiempo. Este na asunto, responsablidat kada uno giya hita. Yangin gai insurance hinemlo` hao, pues todo gasto lokue` dispues de inapase nu i kompanian insurance hago siempre para un` apagaye.

Makat na obligasion yan pot este na motibo na hu appepelayo` giya hamyo na in` atan este na asunton familia ya in` atetuye pumetsige proteksion kada membro gi familian miyo. Si Yuus Maase` yan ghilisow!