Asunton hinemlo` gi halom natibo

Guine gi mapos na Sabalo, hulie` katton pot bentan neñkano` pot para umarikohiye fondu un` malañgo giya Hawaii. Matto gi ha gomgum korasonho i animon familia gi un` dinaña para umakubre gaston hospitat `nai esta i health insurance i malañgo hokog para pago na sakan.

Serioso na asunto i didog na gaston hospitat gi pottamonedan familia. Para i tatnai ha padese este na gotpe, makat makomprende yan ma-agradese i animo yan sakrifisio siha ni mapetsige nu i familia pot gaston hinemlo`. Kalan ayo i fino` kuentos na ayo ha` `nai siña un`lie` i tinadoñg halom tano` yangin un` pokate deste sanpapa` estake matto hao gi sanhilo` gi puntan hogso`.

Diberas na mampos ha affektayo` este na pinadese gi halom natibo sa` hulie` na kontodo irensian tano` manma-impepeña pago komo apas pot siakaso na i familian i malañgo ti siña ha apase i gaston medical referral ni inembrarasa todo gasto deste ke u hanao estake u fatto tatte i malañgo.

Afañielos, mauleg in` kombesasione este siha na familia pot dos primera asunto: 1). Mauleg na preparasion para yangin hago ginacha` dispues nu i gotpen este na chinatsaga. 2). Un` komprende kabales i minasapet yan pininite ginen korason i familia `nai manginacha` nu este na mattiro gi un` guaiyayon na membro.

Pot este na rason na hu sosoyo` todos na pot fabot fanmamahan mas ke uno na health insurance pot preparasion yangin u guaha tinetpe gi membron familia un` chetnot `nai debi umana` hanao ensegidas. Pega komo primera presiso i health insurance sa` hinemlo` familiamo i asunto. Muñga hit na mas tana` presiso apas otro siha na attikulo ke hinemlo` familiata.

I un` manera `nai siña ta tutuhon inadahen serioso siha na chetnot gaige giya hita mismo. Pot ihemplo, megai gi sentadan natibo ha inkluluso mantika, asiga yan asukat. Lokue`, guaha siha mandañosu na bisiu na timauleg para hinemlota tat komo chupa yan maneska. Yangin seso un` daflogue mantika, asiga yan asukat piot ya memegaiña besis `nai losus hao gi menan television, primera besis para un` kombida serioso na chetnot para hago mismo.

Mauleg in` itot mantika, asiga yan asukat gi sentadan miyo. Gi hilo` este, pot fabot fanhuyoñg ya in` fan mamokat gi taftaf ogaan` osino pupueñge `nai fresko lugat mamokat (walk path). Lao gi todo pot todo, gaige este i asunton hinemlo` gi halom guma`. Fanague famaguon manhomlu` na neñkano`,. eksisio yan lokue` masuhayen dañosu siha na tane` tatkomo chupa yan maneska. Hafa ta tanom pago, siempre ha sosoda` i famaguonta. I kualidat linala` niha gaige gi hafa tafanague pago.
****

Antes manfafachochu` i natibo gi fangualuan osino peskan tase yan tano`. Hasan este pago na offisio fuera ke ayo siha i manguagualo` komo kometsiante. Animo este siha na taotague manmananom pot para umabende dispues kinisechan golai yan gulusina siha gi metkao guine.

Mauleg esta na eksisio i manhuyoñg ya siha mismo umayudadaye i taotao niha gi rinimpesan entalo` tinatom, muna`chuchon gaga` yan otro siha na chochu` gi lancho. I punto: mañgalalamten sesso `nai ha estitira kondun niha diaramente. Dispues, manmatachoñg yan taotao niha maprepara gi halom balutan siha yan kostat i para u fan mabende gi sigiente dia.

Ti megai esta na tiempo manguagualo`. Lao memegaiña manguagualo` gi menan television `nai sin presiso mapopogsai mantikan sinturan niha kalan mohon taya` agupa`. Sotta este na bisiu ya un` huyoñg maseha gi oriyan guma` muna` gasgas. Dispues, kone` famaguonmo yan asaguamo ya in` fan hamyo manmamokat. Fanue` i famaguon na homlu` i para u eksisia kinalamten korason, sensin yan gofes niha.

Siempre kalan makat gi tutuhon. Lao chamo hinahalañg, bira hao talo gi sigiente dia ya un` kontinua mamokat yan i tropa. Adumididi` siempre mas libiano i eksisio ni gai minakat gi tutuhon. Muñga ma-gotpeha gi tutuhon. Lao nae` animo pot para unna` guaha kinalamten taotataomo. Mauleg para i sistemamo gi karera mona. Si Yuus Maase`!