Asunton Coñgresso

Pinetsigen asunton linahyan pareho yan checho` un` lanchero. Debi u preparague` deste tutuhon tat komo mana` klaron lugat gualo`, alado, klasen tinanom, abono, uson sisteman hanom (irrigation), metkao yan otro siha preparasion.

“Estague` biahen mame para Washington guine gi mapos na semana. Fuera de `in toma padeset i man-mauleg na atuñgo`ta gi Congresson Estados Unidos pot planuta siha, man-asoda` ham lokue` yan kabesanten man-dañkulo na industria pot para bai`n ketuñgo` haf’ taimano `nai siña ta babaye chalan kosake u siña manhalom mage Marianas”, ilegña si Speaker Benigno R. Fitial

“Este na asunto i mafananaan` ‘nuebo na ekonomia’ ni finañagon ‘high-tech’ na industria gi mas man-adelantao na nasion siha gi entero elmundo”, segun as Speaker Fitial. “Dañkulo na bintahe gaige guine giya Marianas komo patte gi papa` Estados Unidos de America gi todo manera `nai siña tana` guaha mas homlu` na kinalamten gi nuebo siha na industria para i tano`ta”.

“In` kemprende hafa este siha na areglo pot para u siña ta kombida mage i industrian high-tech,” ilegña si Speaker Fitial. “Esta in` tutuhon umina i presiso na asunton ligat pot para ta establese i mafananaan` Information Technology”. Dispues de mapega gi sagaña i nuebo siha na areglo pot para tanala`la` tatte i ekonomiata, “mas libiano para i manatatte na famaguonta sa` siempre u ma`lag futtunan niha”.

“In` faisen lokue` i kabesanten sanpapa` na guma` Congresson Estados Unidos de America para u ayuda hit umaregla tatte i destrosiao na tolai inakomprende kosake u guaha mas antao na dinaña gi todo ta petsige pot para u ta ayudan maisa hit gi bandan ekonomia yan kualidat linala` para i taotaota siha”, ilegña si Speaker Fitial.

“Dididi na` triste sa` umatotpe interes i US Labor Unions giya America yan direchon Marianas gumobietnan maisague`,” ha apunta huyoñg si Speaker Fitial. “Masyo` triste sa` hu tuñgo` klaro na nos pot abuson empleao na manmapoñga hit deste 1993, lao pot para u protehe si Congressman George Miller i industrian magago giya California”.

“Gi katkuet manera `nai hafa` tampen sinetnan guinifen niha pot abuson empleao guine, manhinegse tatte nu i mismo fino` niha sa` yangin sinsero i maplaiteteha na asunton direchon taotao, pues siempre ma-espiha lokue` proteksion direchon taotao Marianas komo sudadanon America pot para umaguaddia todo i finachucho`ta deste 1978”, ilegña si Speaker Fitial.

“Masyo` pago libre hinasogho sa` todo i madagao pot para ta mana` fan matompo klaro na siha mismo manguinaguadeñg nu i atmas niha”.
“Dañkulo checho`ta gi este siha na asunto ya ti baiho para estake fotmat manma-establese man-antao siha na areglo pot para ta benefisia appottunidat i nuebo na sisteman ekonomia ni finañagon i mafananaan` Information Technology”, ilegna si Speaker Fitial.

“Siempre un` dia u fanogcha` mames na fruta siha ginen i troñko ni ta tanom pago `nai u abundansia mas appottunidat para i famaguonta,” ha nota huyoñg si Speaker Fitial. “Estague` dicho checho` setbienten publiko gi todo kinalamten pot asunton linahyan”. Si Yuus Maase`!