Rimulinon mañglo` choda gi oriya

Buente in` hiñgog i burukan sanpapa` na guma` yan i offisinan Washington gi hegso` i Deni`. Manae` katta si Juan N. Babauta para u lagnosgue` ginen i offisinan sanpapa` na guma`. Nahoñg tiempo deste ke matoma padiset na u muebague`.

Ti listo umaksepta i ginagao Speaker Benigno Fitial sa` buente ha popo`lu na ni unogue` siña lumagnos guihe na offisina. Manae` lugat para usuña lao ni ennao ti malago`. Tai konsiderasion gi membron sanpapa` na guma` ni esta pago guaha `nos kuantos mantai offisina.

Si Speaker Fitial tai responsablidat muna` liheñg si Juan N. Babauta gi offisinan sanpapa` na guma`. Lao guaha obligasionña umasegura na guaha offisina para i mangachoñgña siha. Kulan hayuña si Ku man-usa taotao de hemonos kao hana` fan chatsaga i pumalo kontat ke mauleg-gue`. Dios miho, amigo!
****

Magahet na mamaigo` si Ku yan enemigon Marianas gi priniponen para umafederalisa iya Marianas? Hafa na manlagnos salape` para si Sen. Daniel Akaka lao guiya ennao na pindeho i kumeke destrosia i inañgoghon natibo gi papa` i mafitna na kontratan Covenant?

Este na asunto `nai klaro na ti interesta si Babauta ha represesenta giya Washington soluke interes inethon labor unions giya America. Malefa si Ku na hita ha represesenta ti interes Akaka, Congressman George Miller yan inetnon labor unions. Guaha Ku planumo para siakasso na mumagahet planon kontrarion Marianas dumestrosia i solu dokumiento `nai ha pega inañgoghon niha i natibo? Lastima sa` kalu mampos timomu `nai matto i oran madefenden direchon natibo.
****

Sumen namatman lokue` para baiho huñgog na gi mas ke siento na membron Congresson Estados Unidos de American ni man-alie` yan i delegasion Marianas guine gi alacha, ni uno tumuñgo na guaha representanten Marianas giya Washington.

Amigo, gi halom hihot ochu años (eight years) `nai un` okupa i siyan publiko giya Washington ya kada dia unnae` animo tumoma padiset i los prohimos pot interes Marianas, seguroyo` na gi halom 365 dias gi sakan libiano un` choneg madefenden interes natibo guine. Mampos unna` lastima i 2,920 dias gi tetminomo yan mas ke $10 miyon na salape` publiko ya un` bira hao kontra i dinisehan mayoria guine. Dios miho, amigo!

Ni uno gi man-apapase kontribusion tax mumirese ennao na diskuidumo ya siempre u klaro pago na sakan pot ke motibo hafa na taiguennao tai
konsiderasionmo nu i sentimenton taotao Marianas.
****

Yangin hagas sesso hao mama` i temtum sa` tiyamo i industrian magago guine, hafa na aktibidat ekonomia ineffresimo para tahguen `an humuyoñg este na patte gi ekonomiata pago? Repara sa` mampos chago` hao yan hafa dicho i asunton linahyan guine. Ni unabes na este na asunto masede hao para un` ayeg kao amariyo pat agaga` i dinanche na pentura gi kulot kahet. Seguroyo` na un` komprende hafa hu sasañgan ya olara mohon ya un` repara na guaha mas presiso ke todo i diskuidumo gi hilo` silensio na kinentra gi magahet na sentimenton taotao Marianas. E`gaga` ya un` eyag umekuñgog hafa dicho siñienten natibo guine siha na islas. Si Yuus Maase`!