Asunton Coñgresso

Este na attikulo regulat malalagnos `an Lunes preneparan i House
Leadership gi todo sustansiao na asunto gi menan lehislatura.

Areglon Ekonomia

“Todos kumomprende na sumen chatsaga i ekonomiata pago ya mas siempre u
didog este na problema gi uttimon este na sakan”, ilegña si Speaker
Benigno R. Fitial. “I publiko gi señgsoñg siha mas sumesiente este na
chinatsaga gi hechuran taya` chochu` pot mampos bahu i ekonomiata pago”.

“Pot este na rason na in` seseyo` i sanhilo` na guma` (Senate) na u
konsidera amano i siña na chinadeg i mafananaan` ‘Ominibus Economic
Reforms Act’, un` akto `nai siña ta choneg mas benefisio ginen i
ma-abiban kinalamten ekonomia guine, ha apunta huyoñg si Speaker Fitial.

“Siempre ha sede este na akto mas kampo para u fan hagoñg i mangaige
guine pago na industria siha, kontodo mas yano na chalan pot para ta
kombida mas industria mage gi tano`ta”, ilegña si Speaker. “Estegue`
intension este na prinepone ni gaige pot dos mesis esta gi Senate”.

“Hu diseseha mohon na i sanhilo` na guma` (Senate) siña ha komprende na
todo dinitene sin presiso gi akto siha ni manmaseñala para ta aregla i
chinatsaga pago, i man-ordinario na taotaota gi señgsoñg siha para u
kinatga ennao na diskuido gi uttimo besis”, segun as Speaker Fitial.

“Seguroyo` na i senadot siha makomprende hafa este na chinatsaga sa`
taya` esta eskuso para tana` lamen mas i man-e`ensinahyao pago na
taotaota pot diskuido osino huegon lache na politika”. “Yangin guaha
lehitimo na rason na sige ha` este na akto maguot` tatte, pues in`tiñgo`
ha` señores na hamyo mandiskuidao gi esta ha` sumen chatsaga na estao
linala` i taotaota siha”, ha apunta huyoñg si Señor Fitial.

“Hu diseseha na ta eksisia sensian antao na kabayero gi konsiderasion i
akto ni gaige pago gi menan miyo. Didog esta i chinatsagan i mamoble.

Pot fabor fañaonao manpatte gi satbasion i ta fafana` na probleman
ekonomia”, ilegña si Speaker Fitial.

Ha apunta huyoñg si Speaker Fitial na ayo na akto esta monhayan maina as
US Congressman Don Young ya konfotme i prohimo na mauleg na tinituhon gi
para uma-areglan i bahu na ekonomian Marianas.

****

Si Floor Leader Oscar Babauta ha soyu` lokue` i Presidenten i Senate as
Paul Mangloña na umakonsidera amano i siña na chinadeg i mismo proposito
ni hagas manañga nu i komunidat bisnis guine.
Ha apunta huyoñg na mas problema i ekonomia gi uttimon pago na sakan.

Pot este na rason na ha fafaisen i kabesanten i Senate na u apprueba
chadeg i mapropopone na akto.

“Bula famaguonta siempre munsesessita chochu` deste pago na haane
(Biernes, Mayo dia 19), `nai matutuhon i seremoñas graduation gi
eskuelan Marianas siha,” ha apunta huyoñg si Babauta.

“Kontodo i komunidan bisnis hagas man-nañga ausilio ginen i lehislatura
pot mampos bahu i kinalamten niha. Pago i propio tiempo `nai debi tanae`
siha nu i ayuduta pot no u mas baba i rinikohen fondun publiko”, segun
as Señor Babauta. “Maila` tana` fan lagse hit gi propio prinipone siha
`nai siña ta adelanta haanen taotaota”.