Sensian Imbidio gi tiempon eskases

Mas ke mit (1,000) na taotaota man-e`echochu` na tiempo. Megai man-disganao dispues de man-masañgane na esta guaha makone`. Gi un` bakante, mas ke 40 esta 70 na taotaota man-na`halom applikasion. Trabiha ti tatutufoñg i para u fan magradua estudiante pago na sakan. Hafa este sustansiaña?

I komunidat bisnis mampos man-inaminase nu i mafananaan` Asian Flu–poduñg ekonomian Japon yan nasion siha giya Asia. Tinatitiye este nu difirientes lai `nai mas mafuñot kinalamten bisinis siha guine. I resutta? Mas menos rinikohen kontribusion tax ya gi mismo tiempo, mas menos chochu` gi bandan bisnis.

Pot este na rason na sumaonao i komunidat bisnis man-ayuda gi mapreparan i mafananaan` Omnibus Economic Reforms na akto pot para u pula` i ginadon siha ni mangaige gi leblota lai. Ti matman i sanpapa` na guma` gi inapprueban este na prinepone. Gaige este na akto pago gi sanhilo` na guma deste dos mesis malofan.

Hafa i problema? Hu diseseha mohon na lache suspichogho na maguguot` tatte este na akto pot sensian imbidio gi entalo` yan sanpapa` na guma`.

Señores, yangin inkemprende i chinatsaga ni in`sede na umafañago pot sensian lache na politika, pues gaige lamayot patte gi finatso giya hamyo sa` in` hasñgune i mamadedese na publiko sin nesesidat.

Pot fabot muñga ma-usa i sensian imbidio sa` todo i tiempo i publiko umapagagaye i finatsun miyo. Dispues, yangin hagas in` payune inapprueban lai sin konsiderasion,. pot sa` hafa pago na para in` giot` tatte ennao na akto? Hafa na para in` fañaonao lumuño` linala` publiko `nai manman-hula` hamyo na para in` adelanta haanen niha? Pot fabot, fan egaga` ya in` alulaye umapprueba i ginagagao na akto siha kosake siña ta tutuhon umaregla halom gima`ta. Dispues, mauleg in` tutuhon umeyag sumepara taotao yan asunton linahyan!

Makat na obligasion nanan guma`

I imahen nanan natibo ginen un` tiempo sesso ta polu gi hechuran un` palaoan yan neni gi dos kanaiña. Entalo` diario na obligasionña siha, debi u kahulo` gi tatalo` pueñge para una` chochu i neni. Gi sigiente ogaan taftaf manmata para u aregla i amotsan i tropa.
Dispues hana` seguro na todo man-areglao antes de u fan huyoñg gi pettan sanmena. Ti presiso na u fachochu` sa` nahoñg mantension familia ginen i ginanan tatan guma`.

Guiya este siha na tiempo `nai hasan obligasion familia tat komo apas guma`, insurance liheñg familia yan hinemlo`, barato i apas kandet yan hanom, guaha gualo` familia ni tagualulue` pot katsu gi ginanan tatan guma`. Manhihot i taotao siha gi hagas soñgsoñg yan dañkulo sensian komunida gi entalo todos. Manlisto hit bumaba kanaita gi checho` familia, bisino yan entero komunidatta giya Chalan Kanoa yan Susupe.

Matulaika i kinalamten `nai sige mas ma-umenta i numeron taotaota. Ta tutuhon man-ayao salape` para fanliheñg familia gi hechuran guma` padet. Maseha maipe ennao na guma` famlia, ta usune pot sesso ha bisita hit iran dañkulo na pagyo. Esta i pottanmonedan familia mas menos para uson nesessidat.
Estague` tumutuhon inafuetsan nanan guma` man-espiha chochu` para u fan ayuda gi apas guma`, kareta, insurance yan otro siha mas man-lafigo` na kuentan familia.

Makat na katgo ya pot este na rason na debi u guaha inafamauleg yan komprende gi entalo` dos umasagua.