Asunton Coñgresso

Ti na`magof para talie` maditene priniponen asunton linahyan siha piot pago na tiempo `nai sumen chatsaga i kinalamten ekonomian iya Marianas, segun as Speaker Benigno R. Fitial.

“Kada sakan na ditension pot imbidio, tres años mas atrasao manmauleg na intensionta yan planuta umaregla yan umadelanta i haanen i taotaota siha,” ilegña si Speaker Fitial.

“Dudayo` kao finatane` yan imbidio na pisu na manma-elihe i 27 na membron lehislatura ya hu sosoyo` si Senator Pedro P. Reyes (Slow) na u choneg amano i siña ayo na proposito i para ta tutuhon umaregla i ekonomian iya Marianas sa` sumen chatsaga i linala` megai siha na taotaota”, ha apunta huyoñg si Speaker.

I sanhilo` na guma` lehislatura, esdesit, i Senate, hagas ha appruerereba proposito siha sin inekuñgog publiko gi manmapos siha na sakan. Lao `nai matto i prineponen mafananaan` Omnibus Economic Reforms Act hulo` gi Senate, fuera de mafatachuñge tres mesis na tiempo, pago ha kakaikague` pot inekuñgog publiko.

“Mampos hana` disganaoyo` este na plano sa` hagas manmata`choñg gi mapos na sakan siha sin konsiderasion i linala` megai na natibo ni man-e`echochu` pago,” ilegña si Speaker Fitial. “Ayo na akto i mafatachuchuñge i primet pasu `nai siña ta tutuhon areglon mauleg na asunto siha para ta adelanta i bahu na kondision ekonomian tano`ta pago”.

“Dispues, deste mapos na semana matutuhon seremoñias magraduan 12 grado siha na estudianteta,” ha apunto huyoñg si Speaker Fitial, ya ilegña, “estegue` siha na famaguon mina` hu chochoneg amano i siña si Senator Reyes na u kaikaigue` sa` gi uttimo besis i famaguonta para u pinadese i tailaye na sensian imbidio”.

“Yangin mohon deste primet tetminoña si Senator Reyes ha kalamtine manmauleg siha na asunton ekonomia, siempre ti u taiguine na kondision ekonomian Marianas”, ilegña si Speaker Fitial. “Lao hagas maigo` ya gi kada sakan `nai ha diskuidague`, ti menos ke 12 años na ditension `nai maluño` i linala` taotaota siha guine na islas”.

“Gi hilo` este siha na ditension imbidio, mafatto mahalañgho nu i amiguho ginen presidenten i Senate as defunto Olympio T. Borja ni motmut animo para u adelanta haanen osino linala` taotaota,” ilegña si Speaker Fitial. “Taiguihe mohon na sensian kabayero si Senator Reyes gi inakuden todo prinipone para ta adelanta haanen taotaota”.

“I namase` guine na finatane` ti si Senator Reyes soluke mas ke mit na taotaota ni man-e`ensinahyao pago sa` taya` chochu` `nai siña manmañoda`, gi hilo` digno na manera, pottanmoneda para nesessidat familian niha”, segun as Speaker Fitial.

“Pot fabot fan manmata señores ya tafan hita umabiba satton na areglo siha komo dicho pisu `nai siña ta sede taotaota manlala` gi hilo digno yan antao na finapos sin tana` fan tekon pot diskuiduta,” ilegña si Speaker Fitial.