Hinesguan man-kabayeros

I taotao lalala` yan mamatai gi disisionña. Yangin deste antes unna` klaro chatkinemprendemo pot asunto linahyan, pues hafa i man-malalagnos pago ti disision-ho solu disision miyo ni presiso na u fan matalon apunta huyoñg gi publiko.

Guaha fino` kuentos na i finaposta ha indidika hafa mamamaila`. Tuñguon` gi publiko amano na patte `nai hagas tumohge hao, pues ti mapot ma-sensura kao bintaha osino disbintaha para siha (publiko) gi `nai matto papa` gi kritikat na inina hafa hao na mañan taotao gi puestion publiko.

`Nai hagas oppan na tatnai talie` hao giya monana dumefende direchon taotaomo, pues atrasao yangin pago para un` bibira hinasomo. I simiyan mañamo esta doku` ya gaige pago gi menan publiko para uma`ebalua hafa tinanom-mo. Yangin chatmasa, pues ti fahna. Yangin mauleg, añgogho na malachai nu i taotao siha.

Este presion disision, siempre u oppan ya u tunog` papa` gi taotao siha. `Nai un` chanda hineñggen niha, siempre un` mafanue`, gi uttimo besis hafa kabales sentimenton niha. Chamo nina` chachat hinasso sa` i orihinat na disision hago mismo fumatinas. Yangin lilinao pago halom tano` hinassomo, pues katga sa` ginen hago mismo.

Estague` na eskalera `nai a`anog haye dipotsihe kabales kabayero: Antao man-hasso, sesso de ha ekuñgog` hafa sentimenton taotaoña gi señgsoñg siha, lean` gi pinadesen i mas man-na`mase` na taotaoña ya listo mamatinas disision `nai mayotmente para u fan benefisia. Ti hasupag gi asunton disision linahyan. Listo sumañgane taotaoña na lache na direksion mafapoposgue, “bira hamyo guato guine na direksion”. Humidde gi linachiña sa` ha komprende na lahyan tumatitiye-gue`. Pesa un` rato kao gaige hao guine na na eskalera komo kabayero.

Guaha ha lokue` fino man-amko` na ti todo finachucho`ta para hita. Umafagcha` este yan un` fino` biblia i “megai man-ma`agañg lao ti todo man-ma`ayeg”. Makat ta aksepta este na fino` kuentos, lao estague` lokue` na eskalera `nai a`anog kao humidde hao nu i disision gine hilo`. Yangin ti inayeg hao, aksepta ya un` fannae` mit grasias na inagañg hao maseha pot un` rato.

Hu komprende este na asunto ya esta hana` humimidde-yo` sa` hu tuñgo` kabales hafa para guaho. Todo i ti man-kombene hu pega gi hilo` disposisionña i Nanalibreta.

Maseha lokue` makat i estrakadan politika gi entalo` hagas man-afamauleg na taotaota, mauleg ta komprende na temporario ha` este i politika. Muñga na un` fan guot` mahetog sa` hago solu para un` famadese gi tetehnan na haanimo. Huego este na asunto gi papa` sisteman demokrasia. Ti rilihion!

Apmam de u pokate todo klasen mattiro guine na punto. Kontodo i pot gai haga`yo` Carolinas ya hu chage machanda nu i mismo parentela. Lao ni hombre ennao na chinatsaga, ti hu pega gi korasonho. Hu dispacha komo kuensto innosenteria/ Huna` geftao-yo` gi linachen i otro sa` hombre guaho mismo taotao-yo` lokue` ya lalache-yo`. Na dañkulo kampo gi korason miyo sa` huñgan makat `nai matto papa` gi eskaleran parentela este na asunto. Chogue` gi hilo` hinimidde solu i propio na direchon sudadano. Muñga mana` paha i impitu. Si Yuus Maase`!