Saludo para si Tun Josen Magofña

Deste antes gi tiempon Japones, famosu na señor gi huegon bola, guiya i paire na picha` (pitcher) i Saipan Team ni minaneneha as defunto tataho. Guiya i respetao, famosu yan modun megai na manhoben gi bandan huegon bola (baseball).

Guine gi alacha, dimalas i amko` (Tun Josen Magofña) lao sumaga petmanente naaña gi halom estorian Marianas pot kontribusionña guine na huego. Esta inanmkoña, mientras brarabo ti magtos animuña man-ayuda gi manhoben siha na bolero entalo` San Roque yan Tanapag.

Uno si Tun Jose na dadagao nu i sumen makat mapanag boloña. Fayi yan ha dimemoria kada papanag ni kahulo` gi diu. `An ti trineñko hao, pues garentia na mandulalag hao bola piot `nai esta taya` kampo para un` estudiaye haf` para un` chogue.

Gi mismo tiempo, mauleg mamulan gi Short Stop ya paire lokue` mamanag. Ayo na posision i Short Stop mananae` i mas mauleg mañahlao, mandagao yan mañgubre gi tatten i second yan third base. I para u lie` i posision i adeñg i mamamanag esta listo para u falague para u hanao mano i bola.

I dos otro paire mandagao, mamulan diu yan mamanag i defunto Digo` Camacho yan Ricardo (Ruth) Sablan. Ginen un` tiempo umalagnogs kanai i defunto Tun Jose yan si tiuhu Ruth. Ni uno sumede i otro para u fan danche bola. Tabla. I tatatte gi este i tres na manpaire na boleron antes i primuho as Antonio T. Benavente. Ti guiyaya si Ton gi panag, lao talie` ha` na yangin tumoge hao gi home plate, guseña na nina` fandulalag hao bola osino mumatcha hao tatte gi Dug Out dispues biniteya hao.

Mientras lokue` mangagaige hit guine na huego, seguroyo` na mauleg lokue` ta fama tat boleron antes komo i defunton Tanton Benavente (catcher), defunto Bidu`, Tun Josen Seman (third baseman) Pedro Olopai (third baseman gi softball), Tony Satur (softball pitcher) yan otro siha bolero, Ben Attao (slugger), yan otro siha bolero.

Ilegho na mauleg tana` guaha un` seremoñias `nai siña ta onra si Tun Jose yan otro siha hagas manbibola ni manfamasu guine na huego gi entalo` natibo.

Hu hasso `nai trabiha estudianteyo` gi ginen Chalan Kanoa Elementry School (WSR) na ayo na plasa i lugat entero Saipan `an Dameñgo osino ferian July 4th `nai todo i señgsoñg mangaige para u fan ega` bola. Sesso guihe na tiempo manmatto boleron militat yan Guam. Hasan i boleron Marianas `nai mapede. Memegaiña besis `nai sumaga i banderan biktoria guine.

Enfin, tananae` agradesimiento yan digno na onru si Tun Jose pot todo i kontribusioña `nai hana` fan banidosu hit sesso `an bumola Saipan yan otro grupo ginen hiyoñg. Estake ti siña kalamten, geftao nu i tiempoña yan tiniñgo`ña man-ayuda manhoben siha ni mañasaonao gi bola. Maila` ta hahassogue` gi tinayuyotta pot likido yan famosu na bolero deste antes. Si Yuus Maase`!

• • • • •

Mauleg lokue` tanae` saludo todo taotaota ni mañasaonao man-coach gi difirientes huegon manhoben. Estegue` `nai talilie` i sensian komunida `nai sin apas, man-huyoñg pot interes futuron famaguonta. Congratulations para hamyo todos. Konsige i mauleg na sensian komunida pot para ta esgaihon mona homlu` yan gasgas na aktibidat i manhobenta siha. Si Yuus Maase`!