Gi papa mapagahes paraiso

Kada hu huñgog` ayo na sunidon tano`ta “Ti Gi Un` Palasyon I Riko”, sesso teñga ha kone`yo` tatte guihe na tiempo `nai motmut sensian komunida yan kooperasion gi entalo` natibo.

Metgot na mensahe gi este na sunido ayo na patte i ilelegña “Ya ti siña hu tulaika sa` tat mas gefsaga….” Magahet, taya` mas ke un` dikiki` na isla `nai man-mafañago hit todos.

Man-satton i natibo ya tat problema ti mafana` dibuenamente pot para u satba todo achake sin ditension. Todo kinalamten para uno, yan uno para todos. Na`magof i sensian natibo sa` machuchuda` kooperasion yan inadahe gi todo kinalamten niha. Estegue` rekueddon guelo yan guela giya hita.

Hu lie` na fifitme ha` este na kustumbre gi halom natibo. Lao dididi` kulan machalapon `nai ha gacha` hit todo klasen mattiro. Un` asunton linahyan na debi ta rikonose sin ditension pot para ta aregla haanita.

Mampos metgot i sensian politika yan imbidio. Ta yotten ñaihon i antao na dinaña` natibo sa` man-mañoda` hit hugetita politika.

Gi karera mona`, ta atisa sensian satbahe yan inadisgusto. Dimas mohon de ta fan apipet para ta satba problemata, tana` mahetog sensiata kulan professot karisso.

Dispues de todo malabidan tailaye na heñio gi entalo`ta, ta ripara gi sigiente ogaan` na solu ta tailayiye i taotao ha` mismo. Enlugat de ta espiha pot para tana` guaha antao na inakomprende, ta ta`lon umatisa i sensian boliku yan tureti pot no ta fanue` i otro banda na man-doli hit. Ta chuda` gi hilo betgansa i presiso na inakomprende ni man-nanañga humidde na tinituhon.

Ti kustumbreta che`cho` traision sa` fitme pinegan guelo yan guela na pisu yan haligen kooperasion giya hita. Maila` ta guadog tatte ennao na rekueddon nana yan tata ya ta abiba ta`lo dinuebo pot satbasion natibo guine gi papa` mapagahes paraiso. Ni uno mumerese mafa` sasalaguan este siha na islas sa` ti ennao finana`guen nana yan tata.

Ti todo pot todo, gaige i para ta aregla haanita giya hita mismo. Hu diseseha na u guaha nu este na sensia kosake ti hita ha` yan hita man-a`ana`tailaye mientras man-e`ega` i taotao hiyoñg. Si Yuus Maase` yan ghilisow!

• • • •

Esta ha fatoigue hit i tiempon somnag. Pot fabot presetba i hagas i lipog na hanom sinaga. Hu lilie` na gai inanagho este na tiempon maipe. Mas siempre na`tata i hanom gi tipu` siha. Pot este na rason na deste pago mauleg ta guaddia uson hanom.

I uson hanom sinaga, mas safu para i familia yangin mana` loglug antes de magimen osino mana` setbe gi preparasion neñkano` siha.

• • • •

Mauleg in` tataitai i gaseta pot mano na kanton unai ti inaffekta nu i bakteria siha gi halom tasen lagunan Saipan. Mas buente mauleg para i familia yangin man-hanao para i inai santatte siha `nai safu i hanom tase.

Yangin guaha inadahe nu este, pues siempre u fan safu i famaguon ginen ti tuñguon` siha na chetnot ni kinilili` nu i milag hanom guato gi sanme`na na bandan tase.

I hinemlo` tataotaota i mas guaguan para maseha haye. Ti bali otro siha konbiñiente `nai hihot hao atalag gi halom hospitat.

Strictly a personal view. John S. DelRosario Jr. is publisher of Saipan Tribune.