Previous Story
Sustansian bisnis giya Marianas
|
Posted on Apr 10 2001
I Asunto: Hafa masusede `nai guaha tinituhon bisnis guine gi tano`ta ya adelantao kinalamtenña.
I Opiñion: Mauleg ta komprende i benefision kinalamten este na patte gi komunidat Marianas.
I inestablesen bisnis dos ha fañago: 1). Guaha chalan `nai siña sumaonao man-nae` kontribusion tax guato gi kahan Marianas. 2). Man-empleao ennao bisnis taotao ni sumaonao lokue` muna` halom kontribusion tax.
`Nai mauleg kinalamteña i bisnis, mas guaha kampo para u adelantan maisague`. Mas siña mañgone` taotao para ayudanten operasion bisnis. Mas lokue` ma-umenta i kontribusion tax pareho ha` ginen i bisnis mismo yan i taotao ni ha emplelea.
I para un` baba un` bisnis debi ha` i kometsiante u estudiaye hafa na klasen attikulo osino setbisio para u prebeniye i publiko. `Nai ha danche un` klasen nesessidat, siempre mas lagse` hinanaoña komo bisnis. Maseha ñgaian` na tiempo, ti todo kinalamten sano sa` guaha siha otro asunto tat komo areglon lai ni libiano nina` matompu`. Osino, guaha kinalamten gine hiyoñg `nai sina`pet operasionña. Fakto este gi maseha hafa na bisnis guine.
I punto: I inestablesen un` bisnis ha fañago mas fiñkas para iya Marianas yan chochu` para i taotaoña. Ti todo i biahe `nai siña i gobietno ha baba kanaiña dibuenamente para u kubre nesessidat chochu` i natibo siha guine. Pot este na rason na mauleg yan sumen presiso na ta komprende hafa sustansiaña inestablese bisnis guine gi tano`ta.
`Nai homlu` i bandan bisnis guine, mas megai taotaota siña manma-emplea yan lokue` mas megai kontribusion tax para ta kubre nesessidat setbision publiko. Yangin fatsu este na patte gi komunidatta, pues achagigo mamadese i publiko sa` siempre guaha siha na empleao presiso na u fan madispacha ginen checho` niha.
Ta diseseha na u guaha mas pinansensia yan kinemprende pot kinalamten bisnis guine. Muñga ha hita mismo para ta chanda appottunidat `nai siña i taotaota man-mañoda` koyentura para u prebeniye familian niha siha. Si Yuus Maase` yan ghilisow!
