Felis Pasgua Para Todos

Este na semana sumen ma`gas gi halom mañgatoliko siha guine gi tano`ta. Un` tiempo gi sakan `nai ta sakrifisian maisa hit pot penitensia deste sentada yan bisiu siha.

Gi Bietnes na haane (agupa`), megai siempre u fañaonao gi likao para mana`tachon kiluus giya Tagpochau. Fotte na figan este na tiempo, añglo` i tano`, paska kontodo i mas dikiki na hagon cha`guan, potbus i karera, lao pot hiñeñge gi sakrifision kuaresma, kontodo i man-malañgo siempre ha atrebi siha mañaonao guine na lukao.

I ma`gas na misan gayo gi Sabalon Loria magof na dinaña` mañgatoliko sa` la`la` ta`lo i Nanalibreta (kompleaños). Manana yan mas ma`lag` i dinaña familia sa` mata`lon mana`mafñot i talin pogse` ni gumuguot` i natibo siha deste antigo na tiempo. Estegue` un` fitme na tradision relihion gi halom natibo guine siha na islas.

Hu hasso antes `nai memegaiña gi natibo i hagas soñgsoñg `nai mañasaga. Gi Bietnes na haane gi oran `las tres lumiliko` i karetan konbento yan tanores siha yan traka para umana` fan manuñgo` i taotao siha na esta matai i Sainata. I señgsoñg silensio. Ayo `nai guaha dididi` buruka `nai matto i Sabalon Loria ya ha tutuhon i taotao preparasion selebrasion pasgua.

Hu nanae` kada uno giya hamyo un` felis na pasgua yan familian miyo guine gi un` sumen ma`gas na tradision relihion natibo siha. Happy Easter yan Felis Pasgua para todos!

• • • • •

Guaha tres klasen añkla `nai siña i taotao hana` fitme haaniña. I sigiente i tres na añkla: 1). Inañgoghon fuetsan espirituat. 2). Inañgogho gi fiñkasña yan fuetsan salape`. 3). Uson koneksion yan man-fuetsudo na man-atuñgo` siha.

Todo i tres hu chage gi linala`ho. Diberas, tat mas fitme ke inañgogho gi disposision i Saina. Hagas hu letke este na asunto esta i 1989 `nai malofanyo` gi un` tadoñg na sabana `nai solu konsueluho i fuetsan tinayuyotho gi hilo` hinimidde gi Saina.

Deste ayo na haane, ti ma`a`ñaoyo` matai sa` hu komprende kabales na este na patte gi haanen taotao ni uno u soplu. Listoyo` para maseha hafa madisponiho ginen hilo`. Guaha na biahe `nai kulan hinalululayo` humanao pot para bai` ke lie` hafa guaha gi otro bandan lina`la`.

Esta hulie` mano sagaho gi ayo na estao `nai siempre todo u fan malofan. Taya` fumanue`yo` nu i tai achaigua na chalan yan tano` trankilida ke i fuetsan tinayuyotho diaramente kada ogaan` gi duranten sinigonho para i che`cho`. Chage tumatiye satton i tinayuyot kada dia ya un` fan gagao para satbasionmo. Este solu i mas na`magof na konsuelo `nai matto ma-agañgmo.

Pot ositan: Ha faisenyo` i lahiho hafa na sige atburutaoyo` pot mas dañkulo na air-condition. Ilegho: “Para bai`na` hanao para sasalaguan pot siakasso na lache i kodu”. Chumaleg. Era hu fanunue` i prohimo hafa sustansiaña preparasion gi haanen kada taotao.

Strictly a personal view. John S. DelRosario Jr. is publisher of Saipan Tribune.