Previous Story
Nachatsaga na dibin publiko
|
Posted on Dec 10 1998
Makatkukula na mas ke $53 miyon na dibin publiko guaha, ya siña ha` kahulo` este na totat esta $100 miyon, yangin manhalom todos kobransa deste 1995 na sakan.
Sumen nachatsaga este na notisia gi halom rimulinon fotte na sagon ekonomia ni inaminasa nu i mafananaan` Asian Crisis. Mas menos kampo para u kalamten i gobietno gi tetehnan na rinikohen kontribusion tax para u asegura kabales na setbision publiko.
I makatkukula para umarikohe ennao i $13 miyon para pago na sakan. Makat na kontrario sa` fafatta $40 miyon estake siña lañahlalañg apas obligasion gobietnota.
Pot este na rason na debi u guaha satton na inatuñgo` gi entalo` kabayeros siha haf` taimano `nai siña protehe i tetehnan na guinahata pot no u lotgun mas i didog na poduñg rinikohen kontribusion tax.
Este na mattiempo `nai ta ekspepekta manma`gasta na u guaha antao na hinasso gi disposision asunton linahyan espesiatmente pot chafleg ekonomian Marianas. I asunto seriosu ya yangin dididi` muñero hao osino chatkomprende hao nu i asunto, taya` binabaña un` famaisen para un` mana` komprende.
Oppan dimasiao na poduñg mampos i bisnis gi bandan industrian turista. Solu industria ni sumustetene kahan Marianas pago i industrian garment osino magago. Maseha mayot patte gi ekonomia sige manbasnag, figu` i kontribusioña $30 miyon gi sakan. Ti sumasaonao i otro siha bisnis ni manma-establese para u suppotta este na industria. Mas ke 3,000 na familia manbenefifisia ginen chochu` ni finañagon este na industria.
Kuestion siha: Kao justisia yan kombene na para ta puno` este na industria sa` guaha ti gumuaiya fasun `nos kuantos mandueñon fakteria guine? Kao lehitimo na para ta sakrifisia linala` taotaota sa` guaha gi offisiales federat (Interior) ti fabot sa` mampos antao kinalamten este na industria guine? Ke lao haye in` represesenta gi kuetpon lehislatura?
Hamyo ha` señores yan señoras para in` fan mannae` kuenta gi manatatte `nos pot hafa in` petsige pago, lao hafa ti in` chegue ni ginagagao nu i kliman ekonomia. Debi inna` ancho hinasson miyo sa` i asunto pot ekonomia. Saonao man-ayuda sa` pago `nai manesessita i sano yan antao na hinassomo. Si Yuus Maase` yan ghilisow!
