Ti para u fatto si Santa Claus

Lumilikoyo` halom Saipan gi mapos na semana para baiho eñgulo` hafa guaha gi señgsoñg siha. Huñgan, lamegai na familia umadotna hiyoñg gima` niha bonito siha na kandet Christmas. Memegaiña lokue` gi hotel mampos maribaha hafa antes sesso ha pega na kandet para u abiba i haanen gupot siha.
Señat este na umafagcha` yan i flohu na kinalamten ekonomia ni didog inaminasa nu i sagon Japon yan Asia. Hu tuñgo` ha` lokue` na mampos este na mattiro inestraña planon administrasion umadelanta linala` i publiko hinerat. Ni uno siña ta sogne nu este na chinatsaga. Gi mismo tiempo gai konfiansayo` na siña hit mana`ayuda umataha este na chinatsaga.

Hu bisita ayo na kuetpo `nai sesso antes humalom si Santa Claus yan i galaideña yan un` manadan regalo. Ilegña i guaddia nu guaho na dimalas na biahe sa` ti para u fatto si Santa Claus. Hana` tristeyo` este na mensahe sa` kumeke ilegña na ayo siha i mas mamoble na famaguon ti u fan manrisibe regalo ginen as Santa Claus pago na sakan.

Gi hilo` hinimidde, manayuyotyo` na maseha mohon un` milagro u fan finatoigue gi pueñgen Noche Buena. Un` dañkulo na konsuelo matto giya guaho `nai hu konsidera na i mamamaila` na Rai i man rai siha, un` poble lokue` na patgon ni todo i tano` mañgilisyano umabibiba kompliañosña gi pupueñgen Noche Buena. Yangin ginacha`hao triste, namagof korasonmo sa` matto siempre i Nanalibreta ya solu un` ma`lag na regalo gi mamoble ni taya` achaiguaña. Felis Noche Buena!

•••

Hu bisita i puetton Susupe `nai sige i peskadot ha prepara boten niha para u fan huyoñg manpeska. Chaochao mampos i tase, metgot na mañglo`, `nai sige hu konsidera i sakrifision niha pot nesessidat familia.

Un` dañkulo na animo sa` solu ha batbaruye i mandañkulo na lañgat siha guihe huyoñg, ti u kone` i guihan (kacho`) yangin para u saga gi puetto manguife todo dia. Ha gana sensiagho este siha na taotaota pot sensian niha.

Ha tuñgo` ha` na este i tiempon maneñgeheñg mampos muñero man-aka` i guihan. Lao animo man-e`suette puede guaha bendision ya manmañgone` antes de minachom atdao. Makat na offisio gi katkuet manera ayo mina yangin ilegña i peskadot na $5.00 pesos i libran kacho`, listoyo` mamahan sa` hu komprende na makat tumase piot sa` guaha na biahe `nai maliñgo Saipan i santatte.

•••

Pago yangin peskadot halom rubentasion hao, komprendiyon na i hanom tase mampos mañeñgheñg deste mes Nobiembre esta Desiembre. Lao bula munesessita bentan guihan sa` pago na tiempo `nai duro i finatinas eskabeche komo uno gi trandisionat na sentadan natibo. Yangin ti masuette hao guihan sanhalom, pues usune i kacho` osino mahimahi yan wahoo sa` buente ennao ha` siha mas mankonion` na tiempo.

•••

Para i mansatton na manguagualo`, esta siempre ha tutuhon kumusecha tinanom niha dagon apaka` yan lila. Un` fahna na attikulo sa` malago` i natibo buñelos dago na Noche Buena. Dispues, mañge` i dagon lila makado yan manog fresko. Dios miho, gigon maplanta, ni uno kumekuentos.

Debi de ta abiba maseha dikiki` na haddin `nai siña kada familia mananom maseha napa` yan otro siha fina golai yan gulusina. Ai na mañge` siñiente antes kada mamokatyo` gi entalo` maies ni tinanom mame. Hu ayeg hafa malago`ho para tunuho osino atmayas. Pago, mampos i modetno na linalata hana` fan manañgogho hit gi maies ginen lago. Debi ta usune munae` dididi` animo kosake siña ta ayudan maisa hit.