Satton na sensia yan pinasensia

Gi maseha mano na tano` gi halom demokarsia na nasion siha, primera hihot relasionña i gobietno yan i kabesanten bisnis siha. Naturat este na relasion sa` todo atmos banda ha guaguaddia i hinemlo ekonomia pot no u guaha serioso na chinatsaga gi kinalamten todos.

Achogha` ta rikonose i mas man-antao na ekonomia gi entero elmundo, metgot este na relasion gi entalo` gobietno yan i komunidan bisnis.

I kuetpon gobietno layeye fuñgsionña i para u dispone uson kontribusion tax ni ta apapase halom gi kahan Marianas. Este na kontribusion mafatto ginen i tax ni todos, espesiatmente i komunidan bisnis, umapapase halom kada tres mesis.

Lao i didog na sagon ekonomian Japon yan Asia mampos lokue` poduñg na kontodo hita guine ha lachai umarempua i primera industria–turista. Este na chinatsaga todo bisnis maninaminasa, piot ayo siha i sumupopotta i industrian turista.

Ginen este na chinatsaga, manmatcha i los probes hulo` gi Deni` para u fan mamaisen ausilio sa esta taya` aktibidat bisnis. Gi haane, suette yangin guaha dos osino tres na turista manhalom manmangasta. Gi mismo tiempo, achogha` u fan matto turista gi lugat niha, dañkulo lokue` matulaikan bision niha manmangasta. Guaha mas inadahe gi manera `nai ha dispone i salape` niha.

Gi mismo tiempo, mampos sumen nachatsaga sa` manñaba` hit umatende sentimenton niha este siha na kometsiante. I kuestion: Kuanto gi halom este na grupo siña lumañgag sumustene bisnis niha entalo` pago yan uttimon otro sakan gi siha ha` namaisa sin ayudo ginen i gobietno? Hafa sustansiaña este na tinilaika kontra kahan publikon Marianas?

Lokue`, lamegai na lai yan areglo mangaige pago gi leblota ni mampos kontra yan i primera dinisehata–adelanto gi kinalamten bisnis yan nuebo na investment– ni todos hit mumalague`. Kada un` pasu mona, tres tatte. Afañielos, solu ke guaha antao na inebaluan presente na areglo siha gi hilo` mauleg na intension para ta pula` i ginando siha, diberas mas siempre mañoñog galaide` Marianas. Dimas mohon de ta fatta sensian imbidio ni destrosio kontra haanen taotaota, mauleg tana` fan pasensia hit dididi` kosake siña talie` hafa ta petsisige dispues de ketu todos i petbos ni sige ta yalaka` sin presiso.

Hahasso señores yan señoras na gaige gi patman kanai miyo na lumalailai i futuron i manatatte siha. Si Yuus Maase` yan ghilisow!