Hita solu satbadot kualidat linalata

Manhuyoñg hit ginen mapos na sakan, mankahaga`, piliao, yan paladañg ginen todo i mattiro `nai manmatompo` hit ginen un` fotte na sago ni mampos dañosu. Buente pot ti ta hasñgon, mañaonao hit umabiba i chinatsaga sa` manbulachon ñaihon hinasota hafa propio para ta petsige gi halom este na chubasko.

Yangin guaha ti minagofmo osino chatkomprendemo asunton linahyan, pega ennao gi un` banda ya un` tutuhon de nuebo kosake siña un` seden maisa hao lumie` klaro entero litrato `nai manotohge i taotaota ni un` represesenta. Este na sineyo` hu gagagao ginen manma`gasta gi todo atmos banda, praibet, gobietno yan lehislatura.

Didog na asunton linahyan ta fafana` piot pago na sakan. Yangin ti ta usa i maug` na sensian kooperasion gi satbasion problemata siha, hita ha` gi uttimo besis para u hogse todo chatdisision kabesanten gobietno yan bisnis. Pot este na rason na debi u guaha sensian pinasensia yan gineftao pot para u guaha appottunidatta umaregla haanen i taotaota siha guine na islas.

Manhoñggeyo` gi ayo na fino` kuentos: “Todo baba na tinutuhon, pues baba lokue` uttimoña”. Maila` ta asegura na mauleg tutuhonta gi hinalom este na sakan. I punto ni obligao ta aregla gaige gi dos patman kanaita. Todos hit tumuñgo` hafa este siha na problema. Pago i tiempo ni debi tana` fan daña hinassota kosake u siña mas libiano i para ta petsige na checho` linahyan.

I chalan madibide gi talo`. Uno para guato, i otro para mage. I ta diseseha i para ta pula` i ginaddon siha gi hechuran lai ni promohibe adelanto gi bandan ekonomia. Sin kontribusion i komunidan bisnis, mas siempre i fondun publiko kasko. Yangin ti ta aregla pago, uttimoña hokog para apas setbision publiko ni ta nanae` i taotaota pago. Na fan ma`agim korason miyo ya ta chogue hafa propio yan antao kosake ti tana` fan chatsaga mas i taotaota. Si Yuus Maase`.

Ma`ase` sa` barañka i karera

Kustumbren natibo i para tana` fan geftao hit gi manchatsaga na mañeluta osino bisinuta. Yangin guaha namo dos latan satdinas asaite, muñga manañga na estake magagao hao `nai para un` ayuda i prohimuno. Nae` ensegidas gigon biñgbiñg na guaha chinatsagaña.

Yangin un` fafana` un` asunto ni ti un` tuñgo` hafa sustansiaña, famaisen kosake ti un` fababan maisa hao hafa sesso i madiskukute. Gi fino` defunto Jess Mafnas, “Munga mafa` un` tuñgo` i ti un` tuñgo`,” piot ya hago mismo un` tuñgo` ha` na ti un` tuñgo`, lao sige ha` un` atrebe na huñgan un` tuñgo`. Chaba` i sensian professot kariso.

Pago i tiempo `nai debi u guaha mas satton na inadahe gi todo gaston gobietno. Muñga mafatta mañan “ke sera, sera” sa` hombre los probes hagas lokue` man-ñgaha` hulo` gi hegso` i Deni man-e`echocho` pot nesessidat familian niha. Yangin ti preparao hao sumaonao man-adahe, pues nama`agim korasonmo ya un` sede i otro nu ennao na prebilehio.

Yangin guaha un` balestrerekes kasao (palaoan) gi halom offisinamo pot hago i ma`gas, na` para ennao na bisio ya un` fan respeta sa` dudayo` kao un` lañgag yangin machogue hao nu i mismo checho konkabido gi asaguamo. Todo i tiyamo, chamo chochogue gi otro. Tinago` i Saina este, ahe` ti tinago`ho.

Esta ha` i linala`ta naturat komplikao. Para hafa na un` fan espiha mas problemamo. Sige para i Gima` Yuus` ya un` fangagao para satbasionmo mismo ya muñga manañga mangagao asi`i` `nai chachafleg hao gi katremo. Gi todo pot todo, na fitme pinekatmo puede ti un` lotgun sin presiso gi hoyun sinetsot atrasao. Mampos barañka i chalan, ayo mina` debi un` adahen maisa hao mismo. Si Yuus Maase` yan puede bien felis karerata na sakan.