Kantit gi todo atmos banda

Sumen namase` i O`Perlas Iya Pasifiko gi presente sa` todo atmos bandan chalan, kantit. Gi un` banda mampos poduñg i ekonomian Japan yan Asia ya kontodo hita guine mantinemba nu este na chinatsaga. Gi otro bandan chalan, guaha mapetsisige nu i kontratiuta para umafederalisa sustansiao na areglo siha guine tat komo immigrasion yan asunton hutnaleros siha.

Mas mantriste i manmagasta `nai matto mensahe na para u utot i Continental Airlines i uttimo na setbisioña diraktamienta ginen Japon gi ti apmam yan pago. Este na mensahe un` señat na siempre mas poduñg i industrian turista guine. Esta guaha 2,000 na bisnis ni sumupopotta este na industria humuchom pettan niha. Taya` kumakatsu i pisun ekonomiata pago fuera ke industrian magago.

Yangin magahet na i kumokontra Marianas mansinsero gi hineñgen niha na debi u guaha pareho applikasion lai federat guine, pues fuetsao debi lokue` u husga sin ditension kao magahet na guaha kabales manmanae` hit komo sudadanon Amerikano direcho taimano i otro siha mañeluta. Un` attikulo fatta gi este na direchota komo sudadanon Amerika: direchon kabales na representasion gi todo i dos guma` Congresso giya Estados Unidos de America.

Estegue` i fatta na direcho ya dimas mohon de sige umusa hila` kolebla gi ha petsisige pot pareho na applikasion lai osino areglon federat guine, esta giya siha pumetsige i para uma-asegura na manmanae` hit direchota kabales na representasion gi guma` Congresson America. Yangin ni este ti siña ha aregla, pues gueko osino fabulas de chispas i ha chochoneg na asunto. Ti presiso i taotao na u malate` para u komprende este na chinatsaga gi mañegan direchota komo sudadanon Amerikano.

Gi mismo tiempo, este na asunto ha afuetsas hit umebalua (sin tana` saunau hineñgen pattida) i kualifikasion kada kandidato siha ni fumafama na guiya i dicho na petsona para u representa hit gi este siha na asunton linahyan. Debi ta suhaye i sensian lache na disision gi haye ta elilihe para todo puesto gi offisinan publiko. I ta elilihe kulan sendaluta ni tanae` mandato na u kayon fino mona i chalan ni para u pokate i famaguonta. Yangin ni guiya mismo i kandidato gi siña ha danche este na dibina, pues taya` bisnesña mumalague` fotmat na pueston publiko.

Gi todo i manmalalago, menos ke tres hulie` komomprende asunton ekonomia. Ya muñga manmadage, i asunton linahyan pago gi estomagon publiko gaige na dumidimo gi menan tabunakulon ekonomia. Mampos gueko osino tai sinahguan i pottamonedan lamegai gi taotaota na esta man-e`ensinahyao diaramente pot para u asegura na guaha maseha dididi` para mantension familia.

Komprendiyon na i gobietnamentota tai pudet mamatinas ganansia sa` solu i komunidan bisnis masede nu este na fina` obligasion. Pues obligasionta umelihe kandidato siha ni siña sumoyo` nuebo na fina industria guine `nai siña gumuaha mas bisnis yan ganansia para u suppotta i mas manpresiso na nesessidat publiko siha. Pot fabot kemprende este guihe na ora `nai para un` matka papa` i sigiente na membron lehislatura.

Gi kadada` na manera, todo pago finachuchota pot famaguonta. Pot este na rason na sumen presiso na un` eksisia intellihente na disision gi hafa mauleg para futuron famaguonta. Muñga masede na para tafan basnag gi katkuet bandan kantit. Este na inadahe gaige gi dos patman kanai miyo. Eksisia mauleg. Si Yuus Maase`!