Tinilaika siha gi oriyan iya Marianas

Gi un` tiempo, kada Japones ni magradua ginen high school osino koleho, mantinagam nu i mas mandañkulo na kompania siha ya maninefrese petmanente na chochu`. Kalan tradision komunidan bisnis deste finagpo` geran dos. Lao este na tradision ha tutuhon matulaika piot pago na sakan.

Era, todo i mas mandañkulo siha na kompania ha tutuhon umaregla operasion niha `nai gi karera megai na chochu` manmahuchom ya gi mismo tiempo mafunas i tradision petmanente na chochu` para i taotao niha.

Presiso este na areglo sa` ti siña esta i hagas mafa` kustumbre mamai checho` piot gi presente na kondision ekonomian Japon. Megai para u fan taichecho` gi hinichom este na sakan osino siglu. I para u fan inafekta nu este na tinilaika siha gi papa` i nuebo na areglon kompania sumen makat piot para ayo siha i mangai familia pago.

Dispues para mona, taya` esta petmanenten na chochu`. I estao kada empleao mau`udai gi kao mamatinas ganansia i kompania. Un` punto mafatto gi hinasogho: Kao guaha mas mattiro para u fan huyoñg ginen este siha na areglo ginen este siha na tinilaika gi kompanian Japon? Espesifikamente, kao guaha manladañkulo na napu para u talon dumanche hit gi hinalom nuebo na siglu? Estague` i umestototba hinasogho ya seguroyo` na esta manmagmata i manmagasta para u estudiaye i mamamaila` siha na pañgpañg napun tinilaika.

Signifikasion este siha na tinilaika

I primera siempre para u inaminasa i numeron Japones ni para u fan taichecho` deste tutuhon Matso na mes gi otro siglu. Debi tafan listo pumesa hafa sustansiaña este yan i industrian turista guine. Kao `nai ma-umenta mas i numeron para u fan taichecho` u huyoñg mas menos na bisita para Marianas? Estegue` uno na kuestion debi ta estudiaye pot motibo na taya` esta siña ta garentia guine na industria.

I finaposta deste tres años malofan debi ta usa komo kompas gi tinaitai futuron este na patte gi ekonomian iya Marianas. Yangin mas ke dos mit (2000) na bisnis turista humuchom pettan niha deste 1997, pues klaro na mampos bahu kinalamten este i hagas mas metgot na haligen ekonomia guine. Baiho repite: Ti siña esta ta garentia na u homlu` tatte ensegidas este na industria. Tinaka` mas tiempo piot gi estrakadan sustansiao siha na tinilaika ni masusesede pago gi halom i mas mandañkulo siha na kompanian Japon.

Hafa para ta fana` mientras tantos

Mas siempre u didog chinatsagata gi bandan rinikohen kontribusion tax sa` sige ha` mas sulon papa` i ekonomian iya Marianas. Estake para u baba siha tatte i mas ke dos mit (2,000) na bisnis siha, mas flohu i makenarian mamatinas ganansia (salape`) gi hechuran kontribusion tax ni humahalom gi kahan Marianas.

Repara sa` ni salape` para scholarship osino amot para i manmalañgo siña ta kubre taimano antes. Estegue` na tiempo `nai i publiko yan komunidan bisnis man-ñgaha` hulo` gi hegso` i Deni` pot ausilio sa` megai mantai checho` pago. Estegue` na tiempo `nai debi i manma`gasta u fan satton gi disposision i dididi` na fiñkasta. Dañkulo sustansiaña este gi estomagon publiko. Mas sentido i publiko gi hafa ti manmachogue ke hafa manmachogue.

Estegue` un` pahina gi estoriata `nai debi kada uno u pula` chininan pattida ya u hatme trahen publiko pot para u fan ayuda gi masatban un` sumen chafleg na ekonomia pago.

Hahasso ha` na todo un` petsige para satbasion asunton linahyan mauleg siempre para todos. Todo `nai lotgun hao, pues añgogho na i un` sapet pago ti umalefa gi bira birada. Maila` tafan aguot` kanai sa` i asunto mampos teug` na biahe. Si Yuus Maase` yan ghilisow!