Deklarasion intension gi halom Republican

Guaha esta deklarasion kabayeros gi halom pattidan Republican gi kareran haye propio para kandidaton este na pattida gi eleksion gobietno para i sakan 2001.

Si Lt. Governor Jesus R. Sablan esta mamatinas anunsio pot intensioña. Esta lokue` si Juan N. Babauta monhayan ha anunsia planuña. Ti hu tuñgo` haye otro gai interes lao kumeke bula burete gi halom kolat.

I kuestion: Haye mohon propio (pot siakaso na este ha` i dos para u mapraimere) i mauleg yan satton na kandidato para i pattidan republican?

Si Señor Juan N. Babauta kalan fanihen halom liyañg `nai sesso ha tulaika posisioña pot direchon natibo gumobietnan maisa siha. Guihe lago, sesso umasoda` yan kontrarion Marianas. Guine mage, otro sunido kantataña lao mapatañg para u sañgan dibuenamente amano `nai tumotohge-gue`. Kalan kalu timoña piot sa` umatotpe ti siña ha dage i Saipan Chamber of Commerce hafa na ha supopotta un` posision `nai para u yamag enteramente ekonomian iya Marianas. Dios miho representanteta!

Si Lt. Governor Pepero` edukao na señor pot asunton ekonomia. Ginen un` tiempo machochu` gi bandan bisnis. Ha komprende na sin homlu` na kinalamten bisnis, sumen makat Marianas ha kubre nesesidatña gi bandan edukasion, hinemlo` yan pas gi komunidat siha. Guiya umeluluye i 902 na grupon Marianas i inasoda` representanten todo atmoas banda, federat yan tano`ta. Dudayo` kao hayuña fumanihe gi haanen natibo siha.

Hamyo afañielos in` disidi haye sinsero yan satton gi interes famaguon natibo siha. Uno primera ti hu komprende: `Nai kimasoson asunton Marianas gi US Senate, gaige kontento guine i representanteta para u anunsia intensioña malago para gobietno. Estegue` `nai talilie` hafa na sensian taotao si Señor Babauta `nai hana` fofo`na interesña politika ke futuron natibo. Dios miho!
****

Nigap na haane, sanhilo` na guma` Congresson Estados Unidos de America ha apprueba un` akto `nai para u amot Marianas direchoña pudet immigrasion yan sueddo.

Ala kuenta este na aksion, ha hoflag tatte tila`ña i US Senate gi un` kontratan hechuran i Covenant `nai manmanae` hit pudet dumispone este i dos asunto.

Yangin taiguine sentimentoña i US Senate, pues mauleg lokue` unana`lo tatte ayo na direcho i hita solu siña umayeg futtunata gi bandan sisteman gobietnamento.

Estegue` na rason na makat hu bira supottasionho para ayo na señor i rumepresesenta hit pago giya Washington ni sige fumanihe. Yangin mohon taiguenao mañamo na taotao, hafa mohon na ti un` sañgan deste tutuhon ya guaha mismo kontrariumo gi mapos na botasion? Amano chiña kinemprendemo pot sentimenton taotaomo guine na asunto?
Pot fabot, sañgan pago dibuenamente i magahet!
****

Guaha fino` man-amko`: “I palabra muna` tataotao i taotao”. Yangin ti seguro hao kao fitme dos timomu gi checho` linahyan, pot fabot muñga madagen maisa hao, nae` hao mismo appotunidat humuyoñg ginen i guafen kusina kosake ti un` kimason dibatde. Hafa mohon?

Yangin para konbenientemo kada ratu hao bumailan guafe sa` matago` hao sin minalago`mo, sañgan mohon ya ta fan hita manbaila sa` in`tiñgo` ha` lokue` manchaliston. Lao siempre ta fan matto guihe na tolai i siempre makat un` krusa sa` taigue i sentimenton natibo gi korasonmo. Si Yuus Maase`!