Asunton linahyan gi menan Koñgresso

Pot para u guaha mas satton yan fitme na areglo pot ma-abiban ekonomia guine, si Speaker Benigno R. Fitial yan i man-gachoñgña ma-introduse `nos kuantos akto pot para u siña Marianas ha abiba mas industria `nai siña mas libiano linala` todos.

Pot ihemplo, guaha un` akto pot areglon ekonomia `nai siña ninae` mas kampo i komunidan bisnis kumalamten, pareho ha` i mangaige pago yan ayo siha i guaha dañkulo na interes pumega kapitat niha guine gi ma-establesen nuebo siha na industria.

Ilegña si Speaker Fitial na i ma-adelantan i presente yan nuebo siha na industria siempre `los uttimos hana` guaha mas chochu` para i natibo, mas fiñkas ginen i tax sueddo yan ganansia ginen inapasen industria siha ni siña manmagasta gi nesessidat Marianas tat komo edukasion, hinemlo` yan otro siha asunton linahyan.

Un` proposito ni monhayan esta ma-introduse pot ayo i mafananaan` “Flat Tax”, un` sisteman tax ni mas ti mapot pareho ha` para i manmachochochu` yan bisnis siha. I akto ginagagao ma-establesen komission ni para u ina hafa mas mauleg na sisteman “flat tax” para iya Marianas.

Un` manera `nai siña mas Marianas ha abiba hinalom nuebo siha na industria siempre uma-introduse dispues as Speaker Fitial. Ala kuenta, guiya este na akto i para unae` todo nuebo na industria ni mandañkulo alibio gi bandan tax kosake siña ha chule` tatte i orihinat na fondu ni ha gasta `nai ha establesegue` guine. Estegue` machogue giya Guam ayo mina` megai mas hotel yan otro siha industria ni munae` mas appottunidat sumopotta nesessidatña.

Ilegña si Speaker Fitial na yangin manma-apprueba este siha na akto, siempre Marianas u soda` mas ginefsagaña, piot i famaguon natibo siha ni manhuhuyoñg ginen eskuela kada sakan. “Responsablidatho umaligao todo koyentura `nai siña ta kayon mas mauleg na plaset appottunidat para i manatatte ya solu este obligasionho yan i mangachoñg siha”, ha deklara si Speaker Fitial.
****

Si Congressman Norman Palacios muna` halom un` resulasion pot asunton esklabon famaguon giya America. Era, megai na famaguon famalaoan bumebende siha pot para u soda` nesessidat niha. Este na attikulo maprinta gi San Francisco Examiner.

Ilegña si Congressman Palacios presiso na uma-apunta huyoñg na mas seriosu asunton esklabo gi manhoben na famaguon famalaoan giya Amercia ke hagas mansañgan pot asunto esklabo guine gi `nos kuantos bisnis. Ilegña si Congressman Palacios na mauleg i kontrarion Marianas u asegura na ha brochas nifen niha antes de u chalegua` sekos niha pot mutoñg pachot otro.
****

Giya Mozambique, un` lugat este giya Africa, mas ke un` miyon na taotao mandinisplanta ni un` dañkulo na dilubio ni fumatoigue ayo na tano` deste mapos na semana. Dañkulo na destrosiu deste propiadat guma` yan fangualuan `nai megai man-nanañgo pot para u ke gacha` la tatkilo` na lugat siha. Megai man-nahñgo gi hilo` guma` yan troñko estake siña manma`ayuda.

Megai lokue` na Filipino mandinisplanta `nai pagpag i botkan gi fihon señgsoñg niha. Humalom i militat Estados Unidos de America para u fan ayuda. `An pueñge, manliheñg gi fina` kuatton eskuela, `an haane ma-usa i lugat komo eskuela. Dañkulo na chinatsaga fumatoigue este siha na taotague ginen pagpag botkan.

Pagpag lokue` botkan giya Papua New Guinea lao taya` infotmasion malagnos pot destrosion este na ira. Siempre ta tuñgo` dispues hafa sesso na destrosio guaha dispues.

Guine gi mapos na semana, metgot na linao dumanche iya Japon. Gaige i sentron ayo na linao gi lagon Marianas lao mas hihot yan iya Luta. Megai na tinilaika gi kliman entero elmundo ya ta diseseha na ti u danche hit guine giya Marianas. Si Yuus Maase`!