Si Nana Gi Familia

Ilegña i man-amko`: “Si tata humatsa i gima, lao si nana i muna` fitme ennao na haligen guma”. Este na fino` man-amko` sumen magahet sa` taya` mas mesñgog gi halom mattiro soluke i fiet na nanan guma`.

Gi halom pagyo yan katma, fitme tumacho gi fihon asaguaña para u ayuda gi todo kinalamten pot adelanton linala` familian niha. Guiya este na petsona i sesso ha mattitgue` pot famaguonña. Guiya i fitme yan pasifiko na pisun familia ni rumikokohe sesso i tropa.

Buente ti todos hit rumepara na si nana ti petmanente gi linala` familia. Siempre un` dia u amko`, yayas yan lokue` uma-agañg para i tai hinekog na deskansoña. Ha hoñgañg hit `nai matai sa` ta popolu na petmanente gi halom familiata.

Este na palaoan sesso manayuyot gi silensio na patte gi hinassoña para ayo siha na famaguoña i man-diskuidao. Maseha chumachaleg, lao mampos triste korasoña kada ha hasso hafa mamamaila` para ennao siha na finañaguña. Ha tuñgo` haye para u libiano yan chatsaga. Sesso ha apagat ayo siha i sesso dumeskuida siha.

Gi oran chinatsata, sesso ta espiha si nana pot ayudo. Gi oran trinisteta, gaige apaga`ña `nai man-apo` hit pot konsuelo. Ha dimemoria haye sesson gai chinatsaga. Ginen este, silensio muna` sahñge fina` nesessidat para ninaiña `an matto manbisita ennao na patgoña.

Taigue esta si Nana

Un` chetluho, bastara ke guiya mas patgon, mampos inestraña sa` man-añgogho gi as nanan mame. `Nai matai si nanan mame, esta tutuho` lagoña sa` ti ha hoñge na para umadiñgo gi santatte.

Manguife un` chatagmag na humanaogue man-lupog hanom gi bisino `nai ha soda` guato gi nanan mame. Sinañgane na para u inayuda chumule` i hanom tatte giya siha. Ilegña “Polu nañg sa huna` siña ha` chumogue”. Lao ha insiste si nanan mame man-ayuda maseha keke`yao.

`Nai sige guato gi egeñg chalan, gaige si nanan mame gi santatte ha ususune umuma i dos siñko galon na sagan hanom. Pot para u asegura na mauleg ha` si nanan mame, ha birague` para u sañgane na u polu papa` i dos siñko galon hanom.

I dos galon ha` estaba gi hilo` odda`. Taigue si nanan mame!

Ha faisenyo` i chetluho hafa sustansiaña i guinifiña. Hu sañgane na buente binisita as nanan mame para u sinañgane na u tacho gi dos adeñgña sa` taigue-gue` esta para `an chafleg kinalamteña. Magahet na kontodo guaho hana` tutuho` lago`ho sa` dispues `nai hu aksepta na huñgan taigue esta si nanan mame.

****

Un` amigaho lokue`, humanao tatte Manila sa` sen malañgo si nanaña. Gigon tumalag halom gi hospitat, ayo uttimo suspirosña i defunta i ha mantene fitme i kalulot hagaña. Sige tuho` papa` lagoña kontodo i amigaho. Matai dispues de 30 minutos.

`Nai ha birague` tatte Saipan, mañge` pot biahiña tatte gi tano` niha. Kada humanao bumakasion, gaige siempre si nanaña gi plasan batkon aire para u tinagam. Ni achogha halom mit na taotao, libiano ha lie` matan likido na fasun nanaña. Ha togtog ya hanae` agradesimiento pot finatoña.

Hu lie` gi un` banda gi primet pueñge deste ke matto na tutuho` lagoña. Humyoñgyo` kadu` para baiho na setbe i kemon pot para u lagnos huyoñg i ha guguot` na makat sentimento gi korasoña. Gi sigiente dia hu taitai tinege`ña pot uttimo biahiña tatte giya siha.

Ha diskute disisioña kumarera para otro lugat dispues de monhayangue` machochu Saipan. Pinilogho na pot malago` mas mauleg na ekspirensia tat komo otro gaseta giya America. Lao era ha komprende na deste pago mona esta taigue ayo na petsona i fiet tumatagamgue` gi plasan batkon aire.

Ilegña “Matto i tiempo `nai debi baiho tacho namaisa. Taigue esta si nanaho”. Hu tuñgo kabales na tumatañges silensio halom korasoña i amigaho ya magofyo` tumayuyute gi hafa planuña gi kareraña mona.

Haanen Man-Nana na Dameñgo

Pago na Dameñgo i Haanen Man-Nana. Na`magof si nanan miyo ya innae` agradesimiento pot todo sakrifisioña deste haanen `nai manmafañago hamyo. Ha mirese i onru yan attension pago `nai lalala` ti `nai esta ha diñgo hit.

Nae` ni espesiat na attension ya in` sañgane nu i guinaiyan miyo ginen i korason miyo yan Si Yuus Maase` pot todo i konkariño maseha guaha `nai finagchae` triste lokue si nana. Ginen hame guine gi Saipan Tribune “Felis na Haanen Man-Nana” ya i Saina in` fan ninae` mas hinemlo` yan fuetsa gi kareran miyo mona. Congratulations!