Mas didog na chinatsaga

Pot yinease` yan kinemprende na hu na`ayao un` amiguho $20 pesos guine gi mapos na semana. Era, i kompania `nai machochochu` ti nahoñg finatinasña ganansia para u kubre sueddon empleaoña.

`Nai matto-yo` gi gima`, hu konsidedera kuanto na taotaota pareho pinadesen niniha pot mampos bahu i kinalamten bisnis siha pago na tiempo.
Diberas, añgogho na mas mafondu este na patte gi komunidatta gi uttimon pago na sakan.

Lamegai para u fan tai checho` dispues ya u faliñgo i digno yan onru gi manera `nai maprebeniniye nesessidat familian niha. Sumen na chatsaga i mamamaila` na mattiro pareho ha` para i bisnis yan i empleao niha gi uttimon este na sakan.
****

I otganisasion bisnis (Saipan Chamber of Commerce) ha selebra gi mapos na semana i mina` 40 años deste ke mafotma este na inetnon gi as defunto Elias P. Sablan yan Jose C. Tenorio.

Deste haane `nai mafañago este na inetnon, ha tutuhon umespiha hafa mauleg siha na asunto para i manbibisnis guine. I ginen presidente as Señor David M. Sablan ha sosoyo` todo natibo ni manbibisnis na u fañaonao gi Saipan Chamber of Commerce kosake u guaha mas antao na inatuñgo` gi todo asunton manbibisnis.
****

Fakto na ginen i komunidan bisnis `nai ta rikokohe kontribusion tax para setbision publiko deste edukasion, hinemlo` yan otro siha manpresiso na obligasion.

Lao yangin para ta sige ha` umatisa kinentran prinipone siha pot para ta ayuda i manbibisnis pago, guse`ña na ta luño linala` i los probes gi ansia na animon niha fumana` i didog na chinatsaga deste kuatro años malofan.

Yangin ilegniniha is Senadot Pedro P. Reyes (Slow) yan Senadot Jose Dela Cruz na debi umana` balansia i mapropopone na nesessidat publiko, pues mauleg in` esplikaye i taotao hafa ennao na nesessidat siha sin ditension.

Gi hilo` dañkulo na chinatsaga, ya siempre u mas didog este na pinadese gi uttimon pago na sakan, dobla mañgas miyo señores sa` mas ke mit para u fan macha hulo` gi offisinan miyo para u fan mamaisen chochu`. I taya` chochu` i primera problema gi megai na taotaota pago.
****

Gi kada sakan na ta ditene man-mauleg yan antao siha na prinipone ni manma-intended para u adelanta linala` taotaota, pues pot tres años mas gueko i haanen publiko ni munesessita chochu` para u suppotta familian niha.

Yangin pago `nai para u chalegua` sekos niha `nos kuantos senadot, i dicho kuestion señores: Hafa bidan miyo pot siete años na tiempo na manginacha` hamyo indukto? Kao propio i politikan finatane` yan mañan piknik `nai kimasoson guma` Marianas?
****

Duro ha chalegua` sekosña un` ma`gas un` fakterian magago guine na debi umana` fan hanao tatte i taotao hiyoñg siha guine.

Repara amigo kao yangin todo taotao i fakteria ni un` represesenta manmabira tatte kao u kalamten i bisnis `nai un` gagana sueddomo pago?

Ti bonito para tafa` fagas pachotta sentimenton binibo `nai i diskuido gaige lamayot patte giya hita. Gi kadada` na manera: Ti hita ha` famaguon Yuus!
****

I rason na mangaige este siha na taotague sa` tinahoñg numeron natibo para u fan manlagse todo dia gi pareho na animo yan i bisitatata siha. Kulan hu lilie` yangin natibo sastren i fakterian magago siha guine. Ni un` sientemos na ganansia para u fatinas i kompania sa` mas ha` manbibo gi puesuelon kafe yan kanastran mama` ke u prekura hafa dipotsihe obligasion niha komo empleao.

Dispues ginen i kalaguag niha i los prohimos `nai ta chuchule` kontribusion tax para nesessidat setbision publiko. Repara ya unna` lachago` ke menan guieñgmo i fan atanmo. Si Yuus Maase`!