Asunton linahyan dispues de politika

Guaha siha asunton linahyan na debi uma-atetuye maseha haye na pattida gumuot` i administrason yan lehislatura.

Ti siña na ta sede heñion politika na u chanda gi un` banda este siha na asunton publiko pot rason na yangin ti manmasatba, pues hita para ta padese dispues `nai esta sala` i asunto.

Un` attikulo na didog gastoña pot hinemlo` natibo. Megai na tiempo manninana`ye chetnot korason, daibetes, kanset, chetnot amko`, yan otro siha chinatsaga pot hinemlo`ta.

Mampos namatman i megai gi taotaota pago manmamatai reñihion niha `nai los uttimos, debi u fan makula haga` niha tres biahe gi semana gi makinan daialasis (dialysis). Mientras mas tempo, mas ma-umenta i numeron natibo pot este na chetnot.

Debi ta apagaye un` kuestion: Kao mauleg ta petsige inestudian este na chetnot pot para ta ke soda` hafa pumupuno` reñihionta? Kao gaige este na problema gi sentadan natibo `nai megai mantika osino asiga pat todo i dos? Kao este na problema gaige gi haga` natibo (Chamorro yan Carolinas)?

Hafa sinisedita na megai pago taotaota manninana`ye chetnot daibetes yan korason? Kao gaige chetnot daibetes gi haga` natibo? Kao i chetnot korason layeye finañago lokue` nu i sentadata dispues inaminasa `nai hasan tana` guaha eksision tataotaota?

Pot chenot famalaoan: Mas lokue` ma-umenta chetnot kanset susu yan matris. Hafa fumañañago este siha na chetnot? Talo, kao gaige este na problema gi neñkano`ta piot sa` oppan ti mañochochu hit bulai na golai yan fruta?

I natibo lokue` ti satton gumimen amot taimano `nai maprekribe nu i mediko. Ta chule` este siha na amot ya ta pega gi estante. `Nai ha adite hit i chetnotta, ta sañgane i mediko na huñgan ta gigimen amotta lao ta tuñgo` ha` na ta dagen mamaisa hit. Probleman atetu este ya presiso lokue` na tatulaika osino ha luño` hit i problemata mismo.

• • • • •

Guaha megai kuentos gi señgsoñg pot linache i administrasion justisia espesiatmente i offisinan Attorney General.

I kuestion ni mafato ginen sentimenton man-otdinario: Hafa na yangin patgon ma`gas libiano madagao gi papa` guafag ennao na problema, lao `nai i otro esta makoninie` un` bapot na abugao? Na ti magahet na i espiritun yan letran i lai debi pareho applikasionña para todos?

Estegue` un` seriosu na chinatsaga sa` ha funas inañgoghota gi sisteman justisia sa` oppan na ayo ha` i mangai koneksion politika mana` fan libre. Un` asunto na debi mahusga kabales para tana` seguro na maseha haye gaige, i espiritun yan letran i lai pareho mana` applikable gi todos sudadano.;

• • • • •

Mas teug` yan didog i problemata siha na tiempo gi modetno na Marianas. Mas man-konsentidot i mañaina gi areglon famaguon niha. Mas makat ta fafana` pot este sa` yangin ti ta aregla pago, ha palo`pu` hit gi uttimo besis.

Ta diseseha na u guaha mas satton na atetun pot para ta aregla haanita. Mientras sisiña, maila` ta atetuye pot para u guaha pas gi komunidatta ni ha tutuhon-gue` ginen halom gima`ta siha. Na fan satton hamyo nu este sa` sumen na`magof `nai guaha pas yan trañkilida gi señgsoñg siha. Si Yuus Maase`!

Strictly a personal view. John S. DelRosario Jr. is publisher of Saipan Tribune.