Previous Story
Pot Risetan PCB, Tanapag
|
Posted on Jan 16 2001
Asunto: Disniskontento gi risetan PCB ni makondudukta gi taotao iya Tanapag siha.
Opiñion: Mas benefisioso yangin guaha inakomprende kosake siña u fonhayan i mapetsisige.
Ti baba i guaha inadahe gi makondudukta na eksaminasion gi taotao Tanapag pot PCB. Homlu` este na eksisio, lao soluke i punto pot para uma`asegura na i klasen riseta todo atmos banda konfotme.
I bineno (PCB) ni masoda` giya Tanapag presiso na u maketuñgo` amano `nai gaige i teteug`ña ya umakondukta hinisga hafa na daño guaha. Deste tinanom esta pañglao ni hagas ta benefifisio man-nina`ye nu i binenon PCB.
Gi katkuet manera, debi u guaha pinasensia yan inakomprende gi mahuhusga na patte siha giya Tanapag. Yangin guaha ti konfotme hafa makondudukta, debi u presenta sentimentoña guato gi chumocho`gue i makondudukta na eksaminasion siha.
Siña ha` guaha punto siha ni debi umakomprende ni rumesponsasable nu i presente na eksaminasion. Mauleg u guaha dinaña gi todo atmos banda kosake taya` ditension gi presiso na chochu` pot para u ma-asegura na libre i taotao yan residenten Tanapag ginen i binenon PCB.
Este na bineno man-mayute` gi señgsoñg deste antes de u hanao i Depattamenton Navy guine. Ti iya Tanapag ha` `nai gaige este yan otro siha bineno. Guaha siha man-masoda` gi otro patte guine yan otro siha islas tat komo Tinian.
I che`cho` sustansaio na estudio. Debi todo u fan akomprende pot para tana` suha este siha na bineno gi tano`ta.
Komprendiyon i guaha dididi` diniskontento ni finañagon suspecho gi hafa machochogue pago. Ta`lo, mas mauleg yangin todo i atmos banda u daña` pot para u ma-establese inakomprende gi hafa presiso na umachogue pot este na asunto. Homlu` na eksisio i para ta petsige inakomprende gi hafa siha na chinatsaga man-huyoñg guine gi alacha. Si Yuus Maase`!
