Previous Story
Hinalom Nuebo na Presidente
|
Posted on Jan 23 2001
Asunto: Hinalom President Bush gi White House gi mapos na Sabalo, Enero dia 20.
Opiñion: Nuebo na administrasion yan mauleg na señat siha para iya Marianas.
Gi mapos na Sabalo (Dameñgo giya Marianas), si George W. Bush mana` fan hula` mina` 43 Presidenten Estados Unidos de America. Ha chule` tatte ayo na tronu i mañega si tataña ocho años antes as Presidente Clinton.
Layeye i fino`ña si President Bush pot responsablidat sudadano. Ha mente na i planuña para u utot i tax ti u mahñao. Este na promesa uno gi yahululo` `nai malalago para pueston presidente gi mapos na sakan.
I okasion motmut sentimento gi familian Bush. Ha togtug si tataña yan nanaña dispues de mana` fan hula`. Ginachuchuñge lokue` nu i asaguaña yan hagaña.
Para todo i mattiro ni tafaposgue pot para umafederelisa iya Marianas gi papa` administrasion Presidente Clinton, siempre u kayada este na asunto gi papa` administrasion Presidente Bush. Achogha` u guaha pinetsige gi kontrariuta, siempre u matompu` ennao na attikulo `nai matto gi lamasan i presidente.
Gi mismo tiempo, mauleg i ma-appunta para Sekretarian Depattamenton Interior as Señora Gale Norton. Man-hoñge si Señora Norton na mas effektibo yan propio na lamayot patte gi man-sustansiao siha na asunto mas mauleg yangin ti umentalo` i gobietnon federat. Mas este na kinimite pot direchon estado siha umafagcha` yan i ta petsisige na proteksion areglamiento siha ni maiftma gi papa` i kontratan i Covenant Agreement.
Lao ti kumeke ilegña na safu esta iya Marianas pot este na asunto. Debi ta ekspepekta na siempre u guaha talo kinalamten pot para umadiroga hafa gaige gi kontratan entalo` Marianas yan Estados Unidos de America.
Enfin, dididi` gumuaha kampo para hita pot este na asunto ya ta diseseha na i nuebo na administrasion u kontinua i pinetsigen proteksion direcho iya Marianas gumobietnan maisague` taimano i mafitma gi papa` i kontratan i Covenant Agreement. Congratulations para si President Bush, Vice President Cheney yan lokue` i fiet na atuñgo`ta siha gi nuebo na Congresson Estados Unidos de America. Congratulations!
