Previous Story
Dispeddisio gi tiempon eskases
|
Posted on Feb 20 2001
I Asunto: Diskuido gi magastan fondun publiko nu i Commonwealth Utilities Corporation.
I Opiñion: Ti soplu este na ahensia gi inadahen i dididi` na pottanmonedan publiko.
Ha lagnos i gobietno un` otdin guine gi alacha mafananaan` “austerity” `nai todo depattamento yan ahensia debi u mapulan satton todo gaston salape` publiko.
Malagnos este na otdin layeye pot para uma-adahe kabales kontribusion tax ginen i publiko.
I CUC mañgone` 35 mas na empleao, sige mañgarera “first class”, yan subrin sueddo para i empleaoña siha. Masusede este na chatche`cho gi talulo` `nai mas didog poduñg i ekonomian iya Marianas.
Gi mismo tiempo, i CUC listo para u utot kandet todo depattamento yan ahensia siha ni man-delinkuente gi apas utilidat.
Ilegña i Sekretarian Depattamenton Finance na yangin para u ma-utot i kandet, pues ennao i 300 na empleao siempre umana` fan basta gi che`cho niha.
Gi hilo` este siha na chinatsaga, kontodo apas man-malañgo gi Queens Hospital giya Honolulu, siempre umadiskontinua pot ti siña iya Marianas ha apase kuentaña.
Mientras tantos, kalan mohon taya` problemata fondu gi kahan publiko. Pot ihemplo, i Senate sige mangagao subridan sueddo `nai klaro na taya` fondu para este na proposito. Dispues, esta ha` mangai checho` osino man-ritirao i para u rinisibe este na ginagao. Ni uno malago` sumakrifisia-gue` pot i presente na kondision `nai taya` fondu gi kahan publiko.
Direchas kueddas gaston i dididi` na pottanmonedan publiko. Taya` satton na inadahe gi magastan fondun pubiko. Olara ha` mohon ya u lachadeg muna`lo tatte i ekonomia, lao dañkulo na dinida na umasusede este esta buente tres años yan pago.
Debi uma-imbestiga todo disision CUC gi gaston salape` publiko guine gi alacha. I public auditor sin ditension, debi u manda manana`lon manlache siha na disposision fondun publiko. Mauleg umachogue este para i man-ignorante na publiko guine. Lache i para uma-afuetsas i publiko para u apagaye i diskuidon kabesanten todo depattamento yan ahensia siha guine. Si Yuus Maase yan ghilisow!
