Previous Story
Homhum Na Karera
|
Posted on Feb 22 2001
I Asunto: Mas siempre didog chinatsagan i tano` gi halom tres años na tiempo.
I Opiñion: Debi kada familia una` guaha satton na inadahe gi todo ginanan niha.
I taotao munana` sahñge gi tiempon abundansia. I presente na kondision kalan ayo i gai madog na haran hanom ni sige ta sohgue pot para ta asegura na guaha hanom magimen.
Matto i tiempo `nai debi u guaha fuetsao na tinilaika gi atetun (mañan) i natibo siha. Maliñgo gi santatte ayo na tiempo siha `nai siña ta añgogho i Amerikano na u yute` mage diffirientes klasen pakete gi hechuran ayudo. Hombre i Red Cross hana` guaguaha fuñgsion pot para u fan rikohe salape` para i man-disgrasiao siha na taotaota.
Obligao na todo natibo debi u tutuhon deste pago umanalisa i matulaikan i tiempo. Puede lokue` ti ta repite i presente na chinatsaga siha gi primet 25 años gi nuebo na siglu. Yangin ti ta aregla deste pago, pues siempre man-matompu` hit talo gi ge` fe`na.
Sumen na` triste para ta huñgog ginen i famaguonta siha na `an man-felis eskuelan niha, ti para u bira siha mage soluke para u fan man-bisita. Un` sentimento na ha indidika na i mas man-edukao na taotaota ti u fañaga gine sa` hita mismo fumatañgaye appottunidat niha pot bandan cho`chu`.
Haye man-offrerese cho`chu` para i man-magradua siha gi koleho inipos atrasao yan gueko ennao na offresimiento. Ti `nai lamita gi gima` kimason `nai para un hahala i batden hanom para un` puno` i guafe. Lamegai esta na taotaota mangaige guine ni muna` fonhayan eskuelan niha lao esta pago man-tai che`cho` sa` lache banderan niha.
Este na karera siempre hita mismo dumulalag i man-ma-eduka famaguonta, piot ayo i sen tai koneksion yan haye na pattida gaige gi timon. Esta na` chaleg sa` kada tiempon eleksion duro i kandidato siha man-esalao pot edukasion. Lao dispues de man-sañgan, megaiña masañgan ke todo i makomple pot ennao na ineffrese. Gueko osino tai sustansia esta i offresimiento na tiempo.
Olara mohon ya tana` para i hita mismo fuma` sasalaguane i famaguonta `nai ta tuñgo` ha` na i tano`ta i solu paraiso para todos. Si Yuus Maase` yan ghilisow!
