Previous Story
Presiso satton na inadahe
|
Posted on Apr 12 2001
I Asunto: Mas teug` i kuentan publiko ya gi mismo tiempo sige ha` sulon i ekonomian iya Marianas.
I Opiñion: Debi u guaha mas satton na inadahe gi disposision fondun publiko para satbasionta.
Deste kuatro años malofan, machom i hagas tiempon abundansia `nai todo rinkon guine, machuchuda` salape`.
Guiya ayo na tiempo `nai dañkulo abubon Japon ya kontodo Marianas manmirese `nai sige ha chuda` salape`ña katkuet lugat gi entero elmundon.
Lao mafag esta ayo na abubo, kontodo fuetsan salape`ña maribaha, mas bahu i kinalamten gi halom mismo taotaoña. Este na chinatsaga siempre ha transladague` guato gi menos na bakasion gi halom taotaoña gi tiempon eskases.
Chatmiyo fan malelefa na ginen Japon lamayot patte `nai ta kokone` bisitata siha. Animo para u aregla tatte halom gima`ña, lao tinetpe otro chinatsaga `nai sulon ekonomian iya Estados Unidos de America.
Ti in` presesenta este na mensahe pot espanto soluke pot para u guaha suffisiente inapagat gi taotao siha na u tutuhon satton na inadahe gi dididi` na pottanmonedan familia.
Gi mismo tiempo, mauleg lokue` ta soyu` todo empleao gobietno na u fañaonao gi linagnos i gobietnota `nai ha manda na todo dispeddisio u fan ma-ataha amano i siña. I aksion ni ta chule` gi este na sine`yo` para benefisiota mismo. Pot este na rason na mauleg na ta fan aguot` kanai gi inadahen i dididi` na fiñkas iya Marianas.
Mauleg para i todos `nai man-aguot` hit kanai pot para ta guaddia satton i guinahan un` poble na grupon islas siha guine. Todo koyentura `nai siña tana` sahñge dididi` para usuta gi halom didog na chinatsaga para satbasionta gi barañka na karera mona.
Chalapon este na mensahe gi halom taotaota pago. Muñga manañga na estake ni mona ni tatte na para ta fan a`arikonose sa` ha gacha` hit todos indukto. Na` guaha satton na inadahe. Si Yuus Maase` yan ghilisow!
